ព្រះសីហនុ: គុណភាពសុវត្ថិភាពចំណីអាហារ គឺជាអាយុជីវិតរបស់ប្រជាពលរដ្ឋ និងសង្គមជាតិ ដែលតម្រូវឲ្យមន្ត្រីជំនាញ ជាពិសេស មន្ត្រីកាំកុងត្រូល និងស្ថាប័នពាក់ព័ន្ធ ចូលរួមសហការត្រួតពិនិត្យ និង ទប់ស្កាត់មិនឲ្យមានការនាំចូល ឬតាំងលក់ទំនិញខូចគុណភាពឡើយ។
មន្ដ្រីកាំកុងត្រូលសាខាខេត្តព្រះសីហនុ បានឲ្យដឹងថា កន្លងមកមន្ត្រីកាំកុងត្រូលបានបន្ដណែនាំ ជូនដំណឹង និង ហាមឃាត់អាជីវករ មិនឲ្យដាក់តាំងលក់ចែកចាយនូវទំនិញហួសកាលបរិច្ឆេទប្រើប្រាស់ទេ ប្រសិនបើរកឃើញមានទំនិញផុតអាយុកាលប្រើប្រាស់ ខូចគុណភាពនោះ មន្ដ្រីលោកនឹងធ្វើការរឹបអូសយកទៅកម្ទេចចោល។
លោក គឹម វិដាល មន្ដ្រីកាំកុងត្រូលសាខាខេត្តព្រះសីហនុ បានថ្លែងដូច្នេះ នៅក្នុងកម្មវិធីចុះត្រួតពិនិត្យគុណភាពទំនិញតាមផ្សារទំនើបនានាក្នុងក្រុងព្រះសីហនុ កាលពីថ្ងៃទី១ ខែ វិច្ឆិកា ឆ្នាំ ២០១៦ម្សិលមិញនេះ។
លោក បានបន្ដថា ការចុះត្រួតពិនិត្យទំនិញទាំងឡាយ នៅលើទីផ្សារនេះ ជាពិសេស គ្រឿងហូបចុក ត្រូវបានធ្វើឡើងជាប្រចាំ ដើម្បីរក្សាការពារសុវត្ថិភាព គុណភាពចំណីអាហារ សម្រាប់សុខភាពប្រជាពលរដ្ឋ ហើយបានបន្ដក្រើនរំឭក និងពន្យល់អាជីវករឲ្យចេះត្រួតពិនិត្យទំនិញឲ្យបានត្រឹមត្រូវ ។
មន្ដ្រីកាំកុងត្រូល បានបញ្ជាក់ថា សម្រាប់ការចុះពិនិត្យតាមទីផ្សារខាងលើនេះ មិនបានរកឃើញ និង ដកហូតនូវទំនិញផុតអាយុកាលប្រើប្រាស់ គ្មានស្លាកសញ្ញា ឬ ខូចគុណភាពនោះទេ នេះដោយសារតែអាជីវករ និង ប្រជាពលរដ្ឋបានយល់ដឹងច្រើនហើយពីសុវត្ថិភាពគុណភាពចំណីអាហារ បន្ទាប់ពីមានការចុះពន្យល់ណែនាំពីមន្ត្រីកាំកុងត្រូលជាបន្តបន្ទាប់មក៕
មតិយោបល់