បន្ទាយមានជ័យៈ យុវជនជាមុខសញ្ញាជួញដូរ និងចែកចាយគ្រឿងញៀនម្នាក់ ដែលតែងធ្វើសកម្មភាពនៅជិតវិទ្យាល័យថ្មពួក ត្រូវបាននគរបាលជំនាញសហការជាមួយប៉ុស្តិ៍រដ្ឋបាលគម្រូ ពួនស្ទាក់ចាប់បានកាលពីថ្ងៃទី១ ខែវិច្ឆិកា ឆ្នាំ២០១៦ ជាប់នឹងរបងវិទ្យាល័យថ្មពួក ក្នុងភូមិ-ឃុំស្រុកថ្មពួក ខេត្តបន្ទាយមានជ័យ។
លោក អ៊ុក សុផាត អធិការនគរបាលស្រុកថ្មពួក បានឲ្យដឹងថា ដោយមានកិច្ចសហប្រតិបត្តិការជាមួយការិយាល័យជំនាញប្រឆាំងបទល្មើសគ្រឿងញៀននៃស្នងការនគរបាលខេត្តបន្ទាយមានជ័យ បន្ទាប់ពីស្រាវជ្រាវកំណត់បានមុខសញ្ញា និងឈានដល់ការឆ្មក់ចាប់បានជនសង្ស័យខាងលើ។
សមត្ថកិច្ចបានឲ្យដឹងថា ជនស្ស័យមានឈ្មោះ ស្វឿន ប៉ោង ភេទប្រុស អាយុ២៨ឆ្នាំ មានទីលំនៅភូមិ/ឃុំកើតហេតុខាងលើ ព្រមទាំងដកហូតគ្រឿងញៀនប្រភេទគ្រាប់ ពណ៌ក្រហម ផ្កាឈូក ខៀវចំនួន៨០គ្រាប់ ស្រោបថង់ប្លាស្ទិច ពណ៌សថ្លា ចំនួន៣១កញ្ចប់ តូចពីហោប៉ៅ ជនសង្ស័យ ហើយក្រៅពីគ្រឿងញៀនសមត្ថកិច្ច ដកហូតបានម៉ូតូ ដែលជនសង្ស័យ ជិះធ្វើសកម្មភាពចែកចាយ។
ក្រោយការឃាត់ខ្លួន សមត្ថកិច្ចសាកសួររកបក្ខពួក និងកសាងសំណុំរឿងបញ្ជូនទៅស្នងការនគរបាលខេត្តបន្ទាយមានជ័យ ដើម្បីចាត់ការបន្តតាមនីតិវិធីច្បាប់ ៕
មតិយោបល់