បន្ទាយមានជ័យ: នៅព្រឹកថ្ងៃទី៩ ខែវិច្ឆិកា ឆ្នាំ២០១៦នេះ នៅសាលប្រជុំសាលាខេត្តបន្ទាយមានជ័យ បានរៀបចំទិវាខួបអនុស្សាវរីយ៍លើកទី៦៣ បុណ្យឯករាជ្យជាតិ និងបុណ្យកំណើត កងយោធពលខេមរភូមិន្ទ (៩ វិច្ឆិកា ១៩៥៣-និង៩ វិច្ឆិកា២០១៦) ក្រោមអធិបតីភាពឯកឧត្ដម អ៊ុង អឿន ប្រធានក្រុមប្រឹក្សា ឯកឧត្តម សួន បវរ អភិបាលនៃគណ:អភិបាលខេត្តបន្ទាយមានជ័យ រួមនិងកងកម្លាំង សិស្សានុសិស្ស លោក លោកស្រី អញ្ជើញមកពីមន្ទីរស្ថាប័ននានាជុំវិញខេត្តប្រមាណ៤០០នាក់។
បន្ទាប់ពីដាក់កម្រងផ្កា និងគោរពវិញ្ញាណក្ខន្ធព្រះបរមរតនកោដ្ឋ ឯកឧត្តម សួន បវរ អភិបាលនៃគណ:អភិបាលខេត្តបន្ទាយមានជ័យ បានមានប្រសាសន៍លើកឡើងពីព្រះរាជប្រវត្តិទាមទារឯករាជ្យពីបារាំង បានកត់ត្រាទុកជាប្រវត្តិសាស្ត្រក្នុងសណ្តានចិត្ត និងបេះដូងរបស់ប្រជាពលរដ្ឋគ្រប់រូបនូវឥស្សរភាព សេរីភាព ឯករាជ្យភាពដែលខ្លួនបានទទួល។
ការប្រារព្ធទិវាខួបអនុស្សាវរីយ៍លើកទី៦៣(៩វិច្ឆិកា ឆ្នាំ១៩៥៣-និង៩វិឆ្ឆិកា២០១៦)នាពេលនេះ គឺដើម្បី ពង្រឹងជំនឿជឿជាក់លើកកម្ពស់ឧត្ដមគតិ និងមោទនភាពជាតិដែលធ្លាប់ល្បីល្បាញរុងរឿង ជាប្រទេសមានអរិយធម៌ បុរាណដ៏យូរលង់នៅក្នុងតំបន់អាស៊ីអាគ្នេយ៍។
ជាមួយនឹងការប្រារព្ធពិធីនេះ ឯកឧត្តម បានអំពាវនាវដល់គ្រប់ផ្នែក គ្រប់ថ្នាក់ មន្ត្រីរាជការ កងកម្លាំងប្រដាប់អាវុធសូមខិតខំបំពេញភារកិច្ចតាមមុខនាទីរបស់ខ្លួន ដើម្បីសន្តិភាព សុវត្ថិភាព ការរស់នៅប្រកបដោយសុខដុមរមនា របស់ប្រជាពលរដ្ឋក្នុងការអភិវឌ្ឍន៍ប្រទេសជាតិ ឲ្យរីកចម្រើនដូចប្រទេសជឿនលឿនលើសកលលោក ស្របពេលដែលបច្ចុប្បន្នប្រទេសមានសន្តិភាព អភិវឌ្ឍន៍រីកចម្រើនលើគ្រប់វិស័យក្រោមការដឹកនាំដ៏ឈ្លាសវៃ របស់ប្រមុខរាជរដ្ឋាភិបាលកម្ពុជា៕
មតិយោបល់