រតនគិរី: ភ្ញៀវទេសចរ បានធ្វើដំណើរពីបណ្តាខេត្តនានាមកកម្សាន្តនៅខេត្តរតនគិរី ដោយឆ្លងកាត់ខេត្តមណ្ឌលគិរី បានធ្វើការរិះគន់ចំពោះមន្រ្តីផ្នែករដ្ឋបាលព្រៃឈើលំផាត់ ពេលមកដល់ចំណុចអូររវ៉ាក់ក្នុង ស្រុកលំផាត់ មានការកកស្ទះចរាចរណ៍ ដោយសាររថយន្តយីឌុបមួយគ្រឿងដែលបានឆ្លៀតឱកាស ក្នុងរយ:ពេល៣ថ្ងៃ នៃពិធីបុណ្យ អុំទូក អកអំបុក បណ្តែតប្រទីប និងសំពះព្រះខែ កន្លងទៅនេះ ដែលបានលួចដឹកជញ្ជូនឈើប្រណីតប្រភេទធ្នង់យកទៅប្រទេសវៀតណាមតាមច្រកទ្វារអន្តជាតិអូរយ៉ាដាវ។

រថយន្តនោះត្រូវបានគេស្គាល់ថា ជារថយន្តរបស់ឈ្មួញរកស៊ីដឹកឈើ ដុះស្លែនៅក្នុងខេត្តរតនគិរីឈ្មោះ មករ៉ា នឹង ឈ្មោះ ខា ដោយមានការត្រូវរូវគ្នា ជាមួយជំនាញនិងសមត្ថកិច្ច នៅក្នុងស្រុកលំផាត់ ជាពិសេសលោកអភិបាលស្រុកលំផាត់នេះតែម្តង។

ឈ្មួញដុះស្លែឈ្មោះ មករ៉ា នឹងឈ្មោះ ខា នេះបានរកស៊ីដឹកឈើខុសច្បាប់យូរណាស់មកហើយមិនដែលឃើញ អស់លោកសមត្ថកិច្ច និងជំនាញពាក់ព័ន្ធ ព្រមទាំងលោកអភិបាលស្រុក ចុះចាប់បង្រ្កាបម្តងណាឡើយ ប្រហែលជាត្រូវថ្នាំសណ្តំរបស់ឈ្មួញឈើដុះស្លែរូបនេះ ក៏មិនដឹង បានជាព្រិលភ្នែកមិនឃើញសូម្បីតែរថយន្តយីឌុបដឹកឈើប៉ុណឹ្ណងហើយក៏មើលមិនឃើញដែរ។

បើតាមការលួចខ្សឹបប្រាប់ឲ្យដឹង ពីប្រជាពលរដ្ឋនៅក្នុងស្រុកលំផាត់ថា មេឈ្មួញដុះស្លែ ឈ្មោះមករ៉ា នឹងឈ្មោះ ខា នេះរកស៊ីដឹកឈើខុសច្បាប់តាំងពីដឹកតាមរថយន្តកាមរី បាឡែន លុចស៊ីស និងរថយន្តឡង់គ្រីស័រ ឥឡូវរហូតដល់ដឹកនឹងរថយន្តយីឌុបវិញ ដើម្បីបំភាន់ភ្នែកប្រជាពលរដ្ឋ។

ប្រភពដដែលខ្សឹបបន្តទៀតថា ឈ្មួញរកស៊ីដឹកឈើដុះស្លែពីរនាក់នេះ រកស៊ីដឹកឈើទៅបានដោយរលូន ដោយសារមានខ្នងបង្អែក មានសាច់ញាតិជាអ្នកធ្វើការធំនៅក្នុងខេត្តរតនគិរី និងដើរបង់លុយឲ្យសមត្ថកិច្ចជំនាញពាក់ព័ន្ធផងដែរ៕