ភ្នំពេញ: អាជ្ញាធររាជធានីភ្នំពេញរួមជាមួយមន្ត្រីក្រសួងធម្មការ និងសាសនា មេធាវី កងកម្លាំងនគរបាល កងរាជអាវុធហត្ថ គណ:នាយកសង្ឃរួមទាំងភាគីទំនាស់ដ៏រ៉ាំរៃក្នុងវត្ត សុវណ្ណធម្មរាជ ក្នុងសង្កាត់ពញាពន់ ខណ្ឌព្រែកព្នៅ។

ការប្រជុំរកដំណោះស្រាយខាងលើនេះធ្វើឡើងដោយមានការដឹកនាំដោយលោកប៉ា សុជាតិវង្ស អភិបាលនៃគណ:អភិបាលរាជធានីភ្នំពេញ បានបើកកិច្ចប្រជុំដោះស្រាយអធិករមួយនេះ ឲ្យមានការឯកភាព និងស្រុះស្រួលគ្នាឡើងវិញដោយភាគីទំនាស់គឺលោករស់ សារិន ដែលជាអ្នកធ្លាប់បានគ្រប់គ្រង និងកសាងវត្ត និងព្រះតេជគុណគង់ សាម៉ន ចៅអធិការវត្ត សុវណ្ណធម្មរាជ បានឯកភាពទទួលយកដំណោះស្រាយនេះ និងបានសន្យាបញ្ឈប់លែងឲ្យ មានបញ្ហាកើតមានតទៅទៀត។

លោកប៉ា សុជាតិវង្ស បានសុំឲ្យភាគីទំនាស់រួមគ្នាដើម្បីសុខដុមនីយ៍កម្មខាងសាសនា គឺឈ្នះៗទាំងអស់គ្នា។ លោកអភិបាល ក៏បានណែនាំឲ្យមានការផ្សព្វផ្សាយចំណុចដែលបានឯកភាពគ្នាក្នុងកិច្ចប្រជុំថ្ងៃនេះចំនួន៣ ចំណុចដល់ប្រជាពលរដ្ឋពុទ្ធបរិស័ទចំណុះជើងវត្ត គឺទី១.សុំឲ្យបញ្ឈប់ការរស់នៅក្នុងវត្ត សុវណ្ណធម្មរាជ។ ទី២.ត្រូវបង្កើតគណ:កម្មការចម្រុះកសាងវត្ត ដែលមានគ្រប់ភាគីពាក់ពន្ធ័ និងសុំឲ្យលោក រស់ សារិន ធ្វើរបាយការណ៍ឲ្យបានច្បាស់លាស់ពីការសាងសង់វត្ត និងទី៣.បញ្ឈប់លែងឲ្យលោក រស់ សារិន សាងសង់វត្តទៅតាមតែការនឹកឃើញរបស់ខ្លួនខុស ពីរចនាបទខ្មែរ ហើយចាប់ពីពេលនេះទៅរាល់ការកសាងវត្ត ត្រូវតែឆ្លងមន្ទីររៀបចំដែនដី នគរូបនីយ៍កម្ម សំណង់និងសូរិយោដី។

ចាប់ពីក្រោយកិច្ចប្រជុំនេះទៅ អ្នកដែលដើរដុតបញ្ឆេះកំហឹងឲ្យកើតមានអធិករក្នុង វត្ត សុវណ្ណធម្មរាជ តទៅទៀតនោះ ត្រូវទទួលខុសត្រូវចំពោះមុខច្បាប់។ ទំនាស់ដែលកើត មានក្នុងវត្តសុវណ្ណធម្មរាជគឺកើតឡើងតាំងពីវត្តនេះស្ថិតក្នុងខេត្តកណ្តាល តាំងពីមុន ខែតុលា ឆ្នាំ២០១០ មុនកាត់ចូលមកក្នុងរាជធានីភ្នំពេញ។ កាលណោះលោក រស់ សារិន ជាប្រធានគណ:កម្មការកសាងវត្តហើយព្រះអង្គគង់ សាម៉ន ដែលជាចៅអធិការវត្តសព្វថ្ងៃ ជាចៅអធិការវត្តពេញសិទ្ធក្នុងពេលនោះ។ ពេលនោះដែរ លោក រស់ សារិន បានចាត់ទុក ភិក្ខុគង់ សាម៉ន ជាសង្ឃនិមិត្តរូប គ្រាន់តែជាការបន្លំភ្នែកពុទ្ធបរិស័ទខាងជំនឿ និងទាក់ទាញសទ្ធាតែប៉ុណ្ណោះ។ លោក រស់ សារិន បានតាំងខ្លួនជាគ្រូឥសីស្រោចទឹក ហើយផ្អែកលើមហិទ្ធិឫទ្ធិ របស់ខ្លួនរួមជាមួយជំនឿពីមជ្ឈដ្ឋានខ្លះ លោក រស់ សារិន បានរៃអង្គាសប្រាក់ទាំងក្នុងនិងក្រៅប្រទេសយកមកកសាង និងចាយវាយខុសគោលដៅ បង្កើតឲ្យមានអ្នកការពារ អ្នកបម្រើឆ្វេងស្តាំ ហើយឈានទៅប្រព្រឹត្តអំពើមិនគប្បីជាច្រើនករណី។

ចំណែកលោក រស់ សារិន អះអាងថា ដីវត្ត និងសមិទ្ធិផលជាច្រើនក្នុងវត្តគឺលោកជាអ្នកទិញនិងកសាង។ រហូតមកដល់ពេលនេះមានព្រះវិហារ និងសាលាឆាន់ក្នុងវត្តសុវណ្ណធម្ម រាជ នៅមិនទាន់បានសាងសង់រួចរាល់នៅឡើយទេ។

លោកប៉ា សុជាតិវង្ស មានប្រសាសន៍ថា ការពិតលោក រស់ សារិន មានគុណបំណាច់ក្នុងការកសាងវត្តនេះ។គ្រាន់តែលោកធ្វើ មិនត្រូវ ដោយចាត់ទុកវត្តនេះជាវត្តផ្ទាល់ខ្លួន និងចាត់ចែងតាមការនឹកឃើញរបស់ខ្លួនពុំ បានឆ្លងយោបល់ចៅអធិការ គណ:កម្មការវត្ត។ តែទោះបីយ៉ាងណា ពេលនេះគ្រប់ភាគី បានឯកភាពតាមខ្លឹមសារនៃកិច្ចប្រជុំទាំង៣ចំណុចខាងលើដើម្បីបញ្ចប់អធិករដ៏រ៉ាំរ៉ៃមួយនេះ៕