(កំពង់ស្ពឺ)៖ កម្លាំងនគរបាល ស្រុកសំរោងទង សហការជាមួយប៉ុស្តិ៍រដ្ឋបាលត្រពាំង បានធ្វើការឃាត់ខ្លួន មន្ត្រីយោធាម្នាក់ រួមជាមួយគ្រឿងញៀនចំនួន ១៣កញ្ចប់ តូចចំនួន០៩ មធ្យម ០២កញ្ចប់ និងធំ ០១កញ្ចប់ និងបន្តនីតិវិធី ឆែកឆេរបន្ទប់ផ្ទះជួល នៅស្រុកអង្គឈ្នួល ខេត្តកណ្តាល ឃាត់ខ្លួនស្រីម្នាក់ រឹប អូរបានគ្រឿងញៀន ០២កញ្ចប់តូច និងសម្ភារ:ជាច្រើនទៀត ។
ករណីបង្ក្រាបនេះ កាលពីវេលាម៉ោង១០ និង ៤៥នាទី ព្រឹកថ្ងៃទី០១ ខែមេសា ឆ្នាំ២០១៦ ស្ថិតក្នុងភូមិព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ នឹងបន្តនីតិវិធីឆែកឆេរផ្ទះជួលមួយកន្លែង ក្នុងឃុំបែកចាន ស្រុកអង្គឈ្នួល ឃាត់ខ្លួនស្ត្រីម្នាក់ទៀត ត្រូវជាសង្សារ យកមកកាន់អធិការនគរបាល ស្រុកសំរោងទង ដើម្បីសាកសួរ និងកសាងសំណុំរឿងតាមនីតិវិធី ។
លោកអនុសេនីយ៍ឯក យន់ វន មេប៉ុស្តិ៍រដ្ឋបាល ត្រពាំងគង ប្រាប់ថា ជនសង្ស័យមានឈ្មោះ ថ្លាង សុភី អាយុ៣៧ឆ្នាំ ស្លៀកពាក់ឯកសណ្ឋានកងយោធពលខេមរភូមិន្ទ មុខរបរមិនពិតប្រាកដ មានទីលំនៅភូមិអូរក្រាំងអំបិល ឃុំត្រពាំងគង និងបានជួលផ្ទះស្នាក់នៅជាមួយស្រីស្នេហ៍ ។ ចំណែកស្រីស្នេហ៍ដែលសមត្ថកិច្ចទៅឆែកឆេរក្នុងបន្ទប់ជួលមាន ឈ្មោះ រឿន ស្រីមុំ ភេទស្រី អាយុ ២៧ឆ្នាំ មុខរបរបំរើការងារក្នុងហាងផឹកស៊ីមួយនៅស្រុកអង្គឈ្នួល មានស្រុកកំណើតភូមិព្រៃជ្រៅ ឃុំសំបួរ ស្រុកពាមជ័រ ខេត្តព្រៃវែង រកឃើញថ្នាំញៀន ចំនួន ០២កញ្ចប់តូច សម្ភារ:ថង់សម្រាប់ច្រកគ្រឿងញៀន និងឧបករណ៍ សម្រាប់ប្រើប្រាស់បានមួយចំនួន ។
សមត្ថកិច្ច បានប្រាប់ថា មុខសញ្ញាខាងលើត្រូវបានសមត្ថកិច្ច ស្រាវជ្រាវដាក់ការសង្ស័យ និងតាមដានជាច្រើនខែមកហើយ បណ្តាញសម្ងាត់បានរាយការណ៍មកច្បាស់លាស់ ក៏ប្រទះឃើញសមត្ថកិច្ចជំនាញស្រុកមានការសហការជាមួយ ប៉ុស្តិ៍រដ្ឋបាលត្រពាំងឃាត់ខ្លួនបានភ្លាមៗ ដោយមានថ្នាំញៀនប្រភេទម៉ាទឹកកក ចំនួន ១២កញ្ចប់ ក្នុង ០៩កញ្ចប់តូច កញ្ចប់កណ្តាលចំនួន ០២ និងកញ្ចប់ធំ ០១ ។ ប្រភព បន្តថា ក្រោយចាប់ខ្លួនសមត្ថកិច្ចនាំទៅឆែកផ្ទះជួលក្នុងឃុំបែកចាន ស្រុកអង្គឈ្នួល ដែលជននេះ បានជួលស្នាក់ជាមួយស្រីស្នេហ៍រុករកឃើញ ០២កញ្ចប់តូច និងសម្ភារ:ជាទៀត ដែលពាក់ព័ន្ធក្នុងបទល្មើសចែកចាយ និងជួញដូរសារធាតុញៀនដោយខុសច្បាប់ ។
បច្ចុប្បន្ន ជនសង្ស័យទាំង ០២នាក់ សង្សារ រួមទាំងវត្ថុ តាងត្រូវបានបញ្ជូនទៅកាន់អធិការនគរបាល ស្រុកសំរោងទង ដើម្បីកសាងសំណុំរឿងតាមនីតិវិធី ៕
មតិយោបល់