ភ្នំពេញ: រថយន្តហ៊ីយ៉ាន់ដាយ មួយគ្រឿងបានបើកបរ ក្នុងល្បឿនលឿន ជ្រុលទៅបុកជាមួយម៉ូតូចំពីមុខពេញទំហឹង ក្នុងទិសដៅបញ្ច្រាសទិសគ្នា បណ្ដាលឲ្យមនុស្សប្រុសស្រី២នាក់ រងរបួសយ៉ាងធ្ងន់ធ្ងរ ត្រូវបានរថយន្តសាមុយដឹងយកទៅសង្គ្រោះនៅមន្ទីពេទ្យឯកជនភ្លាមៗ។

ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងនៅវេលាម៉ោង ១២និង១០នាទី រំលងអាធ្រាតឈានចូលថ្ងៃទី២២ ខែវិច្ឆិកា ឆ្នាំ២០១៦ នៅចំណុចច្រមុះជ្រូកស្ទឹងមានជ័យ តាមបណ្តោយផ្លូវព្រះមុន្នីរ៉េត កែងនិងផ្លូវវេងស្រេង ស្ថិតក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

តាមប្រភពព័ត៌មានពីប្រជាពលរដ្ឋដែលនៅជុំវិញកន្លែងកើតហេតុខាងលើបានឲ្យដឹងថា នៅមុនពេលកើតហេតុ គេបានសង្កេតឃើញជនរងគ្រោះទាំង២នាក់ បានជិះម៉ូតូម៉ាកហុងដាឌ្រីម ស៊េរី២០១៤ ពណ៌ខ្មៅ ពាក់ស្លាកលេខ ភ្នំពេញ 1CI-3635 បានឌុបគ្នាតាមបណ្ដោយផ្លូវវេងស្រេង ទិសដៅពីលិចមកកើត ក្នុងល្បឿនល្មម ខណ:មកដល់ចំណុចកើតហេតុខាងលើ ក៏ត្រូវបានរថយន្តហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3C-5680 ដែលធ្វើដំណើតាមបណ្ដោយផ្លូវព្រះមុន្នីរ៉េត ទិសដៅបញ្ច្រាសគ្នាក្នុងល្បឿនលឿន ហើយមិនប្រយ័ត្ននិងចាប់ហ្វាំ្រងមិនទាន់ក៏ជ្រុលមកបុកគ្នាចំពីមុខពេញទំហឹងបណ្ដាលឲ្យភាគីខាងម៉ូតូ ប្រុសស្រី២នាក់រងរបួសយ៉ាងធ្ងន់ធ្ងរ ឯម៉ូតូបានគៀបជាប់ក្រោមរថយន្តហូសប្រហែលជិត២០ម៉ែត្រ ហើយភ្លាមៗភាគីខាងរថយន្តបង្កដែលមានគ្នា២នាក់បានចុះពីលើរថយន្តគេចខ្លួនបាត់ស្រមោលពីកន្លែងកើតហេតុ។ ដោយឡែកជនរងគ្រោះទាំង២នាក់ក៏ត្រូវបានរថយន្តសាមុយដឹងយកទៅសង្គ្រោះនៅមន្ទីពេទ្យឯកជនភ្លាមៗផងដែរ។

ក្រោយពីកើតហេតុរួច សមត្ថកិច្ចមូលដ្ឋានបានចុះមកដល់កន្លែងកើតហេតុ និងធ្វើការទំនាក់ទំនងទៅការិយាល័យនគរបាលចរាចរណ៍ផ្លូវគោក រាជធានីភ្នំពេញ ឲ្យចុះមកវាស់វែង យករថយន្តបង្ក និងម៉ូតូយកទៅរក្សាទុក រង់ចាំដោះស្រាយគ្នានៅពេលក្រោយតាមផ្លូវច្បាប់៕