ព័ត៌មានជាតិ

ចូលលួចទ្រព្យសម្បត្តិយ៉ាងច្រើនសន្ធឹកសន្ធាប់ គេចខ្លួន​បាន១ថ្ងៃ សមត្ថកិច្ចក្របួចជាប់

បាត់ដំបង: ជនសង្ស័យម្នាក់ បានធ្វើសកម្មភាពចូលលួចទ្រព្យសម្បត្តិ របស់ជនរងគ្រោះឈ្មោះ វ៉ាន់ រស្មី ភេទស្រី អាយុ២៣ឆ្នាំ នៅចំណុចក្រុមទី១៥ភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបងកាលពីថ្ងៃទី២០ ខែវិច្ឆិកា ឆ្នាំ២០១៦ ហើយបានប្រមូលយកទ្រព្យសម្បត្តិអស់មួយចំនួនធំ រួចគេចខ្លួនបាត់ដោយសុវត្ថិភាព។

បើតាមស្រ្តីរងគ្រោះបានឲ្យដឹងថា ទ្រព្យសម្បត្តិដែលជនសង្ស័យលួចទៅបាត់រួមមាន ៖ -ទូរសព្ទដៃម៉ាក IPhone 7 ពណ៌ផ្កាឈូក១គ្រឿង -ទូរសព្ទដៃម៉ាក IPhone 5s ពណ៌ខ្មៅ ១គ្រឿង -ទូរសព្ទដៃម៉ាក IPhone 5E ពណ៌ផ្កាឈូក១គ្រឿង -ប្រាក់ដុល្លារ 800ដុល្លារ (ប្រាំបីរយដុល្លារ) -ប្រាក់ខ្មែរ 80.000រៀល (ប្រាំបីម៉ឺនរៀល) -វ៉ែនតាស្រី ពណ៌ទឹកតែ១គ្រឿង -ទឹកអប់ម៉ាក ឆាណែល១ដប -កាបូបពណ៌ខ្មៅ១។

ក្រោយទទួលបានព័ត៌មានខាងលើ ឧត្តមសេនីយ៍ទោលោក ស ថេត ស្នងការនៃស្នងការដ្ឋាននគរបាលខេត្តបាត់ដំបង បានបញ្ជាឲ្យឧត្តមសនីយ៍ត្រី ជេត វណ្ណនី ស្នងការរងទទួលផែននគរបាល យុត្តិធម៌ និងលោកអធិការនគរបាលក្រុងបាត់ដំបង ចុះធ្វើការស្រាវជ្រាវជាបន្ទាន់ រហូតដល់ថ្ងៃទី២១ ខែ វិច្ឆិកា ឆ្នាំ២០១៦ កម្លាំងជំនាញនៃអធិការដ្ឋាននគរបាលក្រុងបាត់ដំបងវែកមុខជនសង័្សយម្នាក់នៅចំណុចសង្កាត់ស្វាយប៉ោ ក្រុងបាត់ដំបង។

ជនសង្ស័យឈ្មោះ ស៊ុម ទិត្យ ភេទប្រុស អាយុ៣២ឆ្នាំ ទីលំនៅក្រុម៣០ ភូមិចម្ការសំរោង២សង្កាត់ ចម្ការសំរោង ក្រុង/ខេត្តបាត់ដំបង ព្រមទាំងដកហូតភស្តុតាងរួមមាន ៖ -ទូរសព្ទដៃម៉ាក IPhone 6 ពណ៌ទឹកមាស១គ្រឿង -ទូរសព្ទដៃម៉ាក IPhone 5s ពណ៌ទឹកមាស១គ្រឿង -ទូរសព្ទដៃម៉ាក IPhone 5 SE ពណ៌ទឹកប្រាក់១គ្រឿង -កាបូបម៉ាក PEDRO ពណ៌ខ្មៅ១ -វ៉ែនតា ស្រី ពណ៌ទឹកតែ១ -ខ្សែកកាឡៃ១ខ្សែដាច់បន្តោងរូបផ្លែត្រប់ -ថ្នាំញៀន(ម្សៅសស្រអាប់)១កូនថង់តូច និងកូនសោ ទួនណឺវីសមួយចំនួនទៀត។

បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋាននគរបាលក្រុងបាត់ដំបង ដើម្បីកសាងសំណុំរឿងចាត់ការបន្តតាមនីតិវិធីច្បាប់៕

photo_2016-11-22_10-51-47

photo_2016-11-22_10-51-43

photo_2016-11-22_10-51-45-2

photo_2016-11-22_10-51-45

photo_2016-11-22_10-51-46

មតិយោបល់