ភ្នំពេញ: ក្នុងពិធីបង្សុកូលរាប់បាត្រឧទ្ទិសកុសលដល់វិញ្ញាណក្ខន្ធជនរងគ្រោះដែលបានបាត់បង់ជីវិតក្នុងឧបទ្ទវហេតុ មនុស្សរត់ជាន់គ្នានៅលើស្ពានពេជ្រ ដែលរៀបចំឡើងដោយរដ្ឋបាលរាជធានីភ្នំពេញកាលពីព្រឹកថ្ងៃទី២២ ខែវិច្ឆិកា លោកប៉ា សុជាតិវង្សបានបញ្ជាក់ថា ពិធីតាមបែបសាសនាដើម្បីបង្សុកូលឧទ្ទិសកុសលដល់វិញ្ញាណក្ខន្ធជូនជនរងគ្រោះនៅកោះពេជ្រ រដ្ឋបាលរាជធានីភ្នំពេញនឹងធ្វើឡើងរាល់ឆ្នាំ។

សម្រាប់ឆ្នាំទី៦នៃពិធីបង្សុកូលរាប់បាត្រឧទ្ទិសកុសលដល់វិញ្ញាណក្ខន្ធជនរងគ្រោះដែលបានបាត់បង់ជីវិតក្នុងឧបទ្ទវហេតុមនុស្សរត់ជាន់គ្នានៅលើស្ពានពេជ្រឆ្នាំបានរៀបចំឡើង ដោយមាននិមន្តព្រះសង្ឃចំនួន៨១អង្គ រាប់បាត្រទៅតាមទំនៀមទំលាប់ប្រពៃណីសាសនា។

ពិធីនេះត្រូវបានធ្វើឡើងក្រោមអធិបតីភាពលោក ប៉ា សុជាតិវង្ស អភិបាលរាជធានីភ្នំពេញ និងលោកស្រី លោកអភិបាលរាជធានីនិងលោកស្រីលោកអភិបាលនិងអភិបាលរងខណ្ឌទាំង១២ប្រធាននិងអនុប្រធានមន្ទីរជុំវិញរដ្ឋបាលរាជធានីរួមជាមួយមន្ត្រីរាជការ អាជ្ញាធរដែនដី សាច់ញាតិ ក្រុមគ្រួសារជនរងគ្រោះ និងប្រជាពលរដ្ឋបានចូលរួមជាង៥០០នាក់។

លោក ប៉ា សុជាតិវង្ស បានមានប្រសាសន៍ថានេះជាពិធីបុណ្យតាមបែបសាសនាសុទ្ធសាធដើម្បីឧទ្ទិសកុសលជូនដល់ដួងវិញ្ញាណក្ខន្ធជនរងគ្រោះនៅលើស្ពានពេជ្រ និងសូមបួងសួងឲ្យដួងវិញ្ញាណក្ខន្ធអ្នកដែលបានលាចាកលោកនេះទៅហើយនោះសូមបានទៅកាន់សុគតិភព កុំបីឃ្លៀងឃ្លាតឡើយ។ ម៉្យាងទៀតក៏បានបង្ហាញឲ្យឃើញពីមនោសញ្ចេតនាសោកស្តាយ អាឡោះអាល័យយ៉ាង ក្រៃលែងជាមួយក្រុមគ្រួសារជនរងគ្រោះចំពោះការបាត់បង់ក្រុមគ្រួសារ ញាតិមិត្ត បងប្អូន ក្នុងហេតុការដ៏សោកសង្រេងកាលពី៦ឆ្នាំមុន។លោកបានបន្តថា ការរៀបចំបុណ្យបង្សុកូលនេះធ្វើឡើងក្នុងគោលដៅតែ ម៉្យាងគត់គឺមនុស្សធម៌ និងតាមប្រពៃណីសាសនា ហើយពិធីបែបនេះរដ្ឋបាលរាជធានីភ្នំពេញនឹងធ្វើឡើងរាល់ឆ្នាំ ។

ក្នុងឱកាសនោះដែរអភិបាលរាជធានីបានឆ្លៀតអំពាវនាវឱ្យប្រជាពលរដ្ឋរាជធានីភ្នំពេញដែលមិនទាន់បានទៅចុះឈ្មោះបោះឆ្នោតប្រញាប់នាំគ្នាទៅចុះឈ្មោះបោះឆ្នោតឱ្យបានគ្រប់គ្នាដោយពេលនេះនៅសលតែរយ:ពេល៦ថ្ងៃទៀតប៉ុណ្ណោះបើបងប្អូនអត់បានទៅចុះឈ្មោះបោះឆ្នោតគឺអត់សិទ្ធិបោះឆ្នោតជ្រើសរើសអ្នកដឹកនាំមូលដ្ឋានខ្លួននោះទេ។

ទន្ទឹមនឹងនោះ លោក ប៉ា សុជាតិវង្ស បានប្រកាសថា ពិធីបង្សុកូលឧទ្ទិសដល់វិញ្ញាណក្ខន្ធជនរងគ្រោះនៅកោះពេជ្រនេះ សាលារាជធានីភ្នំពេញនឹងធ្វើឡើងជារៀងរាល់ឆ្នាំនៅថ្ងៃទី២២វិច្ឆិកា និងសូមអញ្ជើញសាច់ញាតិ បងប្អូន ជនរងគ្រោះចូលរួមតាមពេលវេលាកំណត់នេះ។ ក្នុងនោះដែរ ក៏មានការអញ្ជើញរាប់បាត្រព្រះសង្ឃចំនួន៨១អង្គ និងបានសំណេះសំណាលជា មួយក្រុមគ្រួសារជនរងគ្រោះ និងបាននាំយកថវិការបស់សម្តេចអគ្គមហាសេនាបតីតេជោ ហ៊ុនសែន និងសម្តេចគតិព្រឹទ្ធបណ្ឌិតប៊ុនរ៉ានី ហ៊ុនសែនទៅជូនដល់គ្រួសារជនរងគ្រោះចំនួន ៩៨នាក់ក្នុងសពម្នាក់រដ្ឋបាលរាជធានីភ្នំពេញផ្ដល់ជូននូវថវិកា២០ម៉ឺនរៀល និងជូនលោកយាយ លោកតាដែលបានចូលរួមក្នុងពិធីនេះផងដែរ៕