កាលពីម្សិលមិញនេះ ឯកឧត្តមទេសរដ្ឋមន្ត្រី ស៊ុន ចាន់ថុល បានទទួលជួប សំណាក់គណៈប្រតិភូវៀតណាមដឹកនាំដោយឯកឧត្តម Nguyen Nhat អនុរដ្ឋមន្រ្តីក្រសួងដឹកជញ្ជូន នៃសាធារណរដ្ឋសង្គមនិយមវៀតណាម ក្នុងគោលបំណងពិភាក្សាអំពី កិច្ចសហប្រតិបត្តិការជាយុទ្ធសាស្រ្ត ក្នុងវិស័យដឹកជញ្ជូនរវាងក្រសួងសាធារណៈការ និងដឹកជញ្ជូននៃព្រះរាជាណាចក្រកម្ពុជា និងក្រសួងដឹកជញ្ជូន នៃសាធារណរដ្ឋសង្គមនិយមវៀតណាម។

ក្នុងនោះដែរ ឯកឧត្តមទេសរដ្ឋមន្រ្តី ស៊ុន ចាន់ថុល បានស្នើឱ្យភាគីគណៈប្រតិភូពិចារណាលើការអភិវឌ្ឍផ្លូវដែករវាង ក្រុងបាវិត និងទីក្រុងហូជីមិញនៃប្រទេសទាំងពីរ ដើម្បីទាក់ទាញវិស័យឯកជនឱ្យវិនិយោគលើការអភិវឌ្ឍផ្លូវដែកពីភ្នំពេញទៅក្រុងបាវិត និងទៅទីក្រុងហូជីមិញ។

ជាមួយគ្នានេះផងដែរ ឯកឧត្តមទេសរដ្ឋមន្រ្តី ស៊ុន ចាន់ថុល និងគណៈប្រតិភូ បានពិភាក្សាអំពីបញ្ហាអាទិភាពនៃការអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ និងផ្លូវដែក ដែលប្រទេសវៀតណាម និងកម្ពុជាអាចសហការគ្នា ដើម្បីធ្វើឱ្យប្រសើរឡើងដល់ការតភ្ជាប់រវាងប្រទេសទាំងពីរ។

តាមការសិក្សារបស់ អង្គការចៃកា (JICA) លើការអភិវឌ្ឍន៍ផ្លូវល្បឿនលឿនភ្នំពេញ-បាវិត ប្រវែង ១៧០គីឡូម៉ែត្រ គឺអាចនឹងចំណាយទុនសាងសង់ប្រមាណ ៣ពាន់លានដុល្លារអាមេរិក នឹងរយៈពេលសាងសង់ ១០ឆ្នាំ។

ឯកឧត្តម ស៊ុន ចាន់ថុល ទេសរដ្ឋមន្រ្ដី រដ្ឋមន្រ្ដីក្រសួងសាធារណការ និងដឹកជញ្ជូន បានប្រាប់ក្រុមអ្នក សារព័ត៌មានកាលពីពេលថ្មីៗនេះថា ការកសាង និងពង្រីកផ្លូវជាតិសំខាន់ៗនេះរាជរដ្ឋាភិបាលមានទិសដៅ ច្បាស់លាស់ក្នុងការកសាងហេដ្ឋារចនាសម្ព័ន្ធជា ពិសេសប្រព័ន្ធផ្លូវថ្នល់ ដែលចាត់ទុកជាសរសៃឈាម ក្នុងការធ្វើចរាចរណ៍ ការធ្វើដំណើរ ដឹកជញ្ជូននៅទូទាំងប្រទេស។

ឯកឧត្តមបានបញ្ជាក់ថា ចាប់ពីឆ្នាំ២០១៨ខាងមុខតទៅ រាជរដ្ឋាភិបាលនឹងពង្រីក ផ្លូវជាតិលេខ ១១ ពីអ្នកលឿងរហូតដល់ ផ្លូវជាតិលេខ៧ ហើយចំពោះគម្រោងកសាងផ្លូវតភ្ជាប់ពីភ្នំពេញទៅអ្នកលឿង រហូតដល់ បាវិត និងទៅកាន់ប្រទេសវៀតណាម អង្គការចៃកានៃប្រទេសជប៉ុន កំពុងតែសិក្សា ធ្វើជាផ្លូវ Express Way ដើម្បីពង្រីកជា៤គន្លង។

ការសិក្សាគម្រោងមានគោលបំណង ស្វែងរកលទ្ធភាព និងអត្ថប្រយោជន៍នៃការសាងសង់ផ្លូវល្បឿនលឿននេះ ហើយអត្ថប្រយោជន៍នៃគម្រោងនេះ រួមមាន ការកែលម្អ ការភ្ជាប់ទំនាក់ទំនង ការអភិវឌ្ឍន៍ក្នុងតំបន់ កាត់បន្ថយពេលធ្វើដំណើរ កាត់បន្ថយចំណាយលើការដឹកជញ្ជូន កាត់បន្ថយបញ្ហាកកស្ទះចរាចរណ៍ និងពង្រីកពាណិជ្ជកម្មជាមួយបណ្តាប្រទេសជិតខាង។

គម្រោងផ្លូវល្បឿនលឿននេះ គ្រោងចំណាយទឹកប្រាក់ប្រមាណ ៣ពាន់លានដុល្លារអាមេរិក ក្រោមជំនួយហិរញ្ញប្បទានរបស់រាជរដ្ឋាភិបាលជប៉ុន ដែលគ្រោងបញ្ចប់ការសាងសង់មុនឆ្នាំ ២០៣០ ហើយគម្រោងនេះ នឹងជួយលើកស្ទួយដល់សេដ្ឋកិច្ចប្រទេសកម្ពុជាផងដែរ។

រីឯគម្រោងផ្លូវល្បឿនលឿនរបស់ប្រទេសវៀតណាម តភ្ជាប់ពីព្រំប្រទល់វៀតណាម (ខេត្ត Tay Ninh) ទៅទីក្រុងហូជីមិញ មានប្រវែង ៥៥គីឡូម៉ែត្រ គ្រោងនឹងចំណាយទឹកប្រាក់ប្រមាណ ៧០០លានដុល្លារអាមេរិក ហើយនឹងបញ្ចប់ការសាងសង់ក្នុងរយៈពេល ១០ឆ្នាំ។

យោងតាមសារព័ត៌មានក្នុងស្រុករបស់ប្រទេសវៀមណាម ផ្លូវល្បឿនលឿនគឺមាន ៦គន្លង ដែលអនុញ្ញាតិឲ្យអ្នកបើកបរ អាចធ្វើដំណើរក្នុងល្បឿន ១២០គីឡូម៉ែត្រក្នុង ១ម៉ោង។

គួរជម្រាបផងដែរថា នៅពេលគម្រោងផ្លូវល្បឿនលឿននេះបញ្ចប់ ទំហំពាណិជ្ជកម្មរវាងប្រទេសទាំងពីរ នឹងបន្តកើនឡើងកាន់តែខ្លាំង និងជួយអភិវឌ្ឍន៍ប្រទេសកម្ពុជាទាំងមូល ដោយតភ្ជាប់ទៅកាន់ប្រទេសក្នុងតំបន់អាស៊ាន៕