អចលន​ទ្រព្យ

ស្ថានីយចំណតរថយន្តមិត្តភាពកម្ពុជា-ជប៉ុន ខេត្តកំពង់ឆ្នាំង ដាក់សម្ពោធជាផ្លូវការ

ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានបង្ហាញជំនឿថា វត្តមានស្ថានីយចំណតរថយន្តមិត្តភាពកម្ពុជា-ជប៉ុន ខេត្តកំពង់ឆ្នាំង នឹងជួយពង្រឹងសេដ្ឋកិច្ច និងហេដ្ឋារចនាសម្ព័ន្ធខេត្ត ព្រមទាំងបង្កើតមុខរបរ និងប្រាក់ចំណូលបន្ថែមដល់ប្រជាជនក្នុងមូលដ្ឋាន។ លើសពីនេះ ស្ថានីយថ្មីក៏នឹងជួយលើកកម្ពស់វិស័យទេសចរណ៍ តាមរយ:ការបម្រើសេវាកម្មម្ហូបអាហារ ការលក់វត្ថុអនុស្សាវរីយ៍ ឬផលិតផលប្រចាំភូមិ/តំបន់ថែមទៀត។

ការថ្លែងរបស់ ឯកឧត្តមរដ្ឋមន្ត្រី បានធ្វើនៅក្នុងពិធីប្រគល់-ទទួល និងសម្ពោធស្ថានីយចំណតរថយន្តមិត្តភាពកម្ពុជា-ជប៉ុន ខេត្តកំពង់ឆ្នាំង និងទិវាជាតិលើកកម្ពស់ការប្រើប្រាស់ផលិតផលខ្មែរ លើកទី១ នៃយុទ្ធនាការទិញផលិតផលខ្មែរ រដូវកាលទី៣ ដែលរៀបចំឡើងក្រោមគណ:អធិបតីភាពរបស់ ឯកឧត្ដម យឹម ឆៃលី ឧបនាយករដ្ឋមន្ត្រី ប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ និងជាប្រធានគណ:កម្មាធិការជាតិ ជំរុញចលនាភូមិមួយផលិត ផលមួយ និងឯកឧត្តម ហ៊ិដេហិសា ហូរីនូឈិ (Hidehisa HORINOUCHI) ឯកអគ្គរាជទូតជប៉ុនប្រចាំនៅកម្ពុជា។

នៅក្នុងឱកាសនោះ ឯកឧត្តម ប៉ាន សូរស័ក្តិ បានលើកឡើងពីគម្រោងពង្រីកជាតិលេខ៥ របស់រាជរដ្ឋាភិបាល ឲ្យក្លាយជាផ្លូវដ៏ធំក្នុងតំបន់អាស៊ាន (ASEAN High Way) សំដៅបម្រើវិស័យទេសចរណ៍ និងសម្រួលពាណិជ្ជកម្ម ហើយស្ថានីយចំណតរថយន្តថ្មីនេះ នឹងអាចឆ្លើយតបតម្រូវការឈប់សំចតរបស់អ្នកដំណើរគ្រប់ជាតិសាសន៍ ព្រមទាំងសម្រួលដល់ការដឹកជញ្ជូន និងការចែកចាយទំនិញ ទៅកាន់ច្រករបៀងសេដ្ឋកិច្ចខាងត្បូង និងច្រករបៀងខាងកើត-លិច ផងដែរ។

ទន្ទឹមគ្នានោះ ឯកឧត្តមរដ្ឋមន្ត្រី ក៏បានអំពាវនាវដល់ប្រជាពលរដ្ឋ និងអ្នកធ្វើដំណើរទាំងអស់ ចូលរួមថែរក្សាសម្ភារ:បរិក្ខារ និងបរិស្ថាននៅក្នុងស្ថានីយឲ្យបានល្អ និងបានសំណូមពរដល់អាជ្ញាធរខេត្តគ្រប់លំដាប់ថ្នាក់ ជួយសហការគ្រប់គ្រងសន្តិសុខ និងថែរក្សាសុវត្ថិភាពជូនភ្ញៀវទេសចរជាតិ និងអន្តរជាតិ ដើម្បីថ្លែងអំណរគុណ និងផ្តល់កម្លាំងចិត្តដល់ប្រទេសជប៉ុន ដែលជាម្ចាស់ជំនួយ។

បន្ថែមលើនេះ ឯកឧត្តមរដ្ឋមន្ត្រី ក៏បានថ្លែងអំណរគុណយ៉ាងជ្រាលជ្រៅដល់រដ្ឋាភិបាល និងប្រជាជនជប៉ុន ដែលកន្លងមកបានជួយកសាងហេដ្ឋារចនាសម្ព័ន្ធរូបវន្តយ៉ាងច្រើននៅកម្ពុជា តួយ៉ាងដូចជាចំណតរថយន្តមិត្តភាពកម្ពុជា-ជប៉ុន ដែលបានដាក់សម្ពោធថ្ងៃនេះ ព្រមទាំងអាជ្ញាធរខេត្ត និងស្ថាប័នពាក់ព័ន្ធ ដែលបានសហការ និងគាំទ្រការអនុវត្តគម្រោងកសាងស្ថានីយរថយន្តនេះ តាំងពីដើមរហូតដល់ចប់ជាស្ថាពរ។

សូមជម្រាបថា ស្ថានីយចំណតរថយន្តមិត្តភាពកម្ពុជា-ជប៉ុន ខេត្តកំពង់ឆ្នាំងនេះ គឺជាសមិទ្ធផល ទី២ ដែលត្រូវបានសាងសង់តាមលក្ខណ:ស្តង់ដារអន្តរជាតិ ក្រោមជំនួយឥតសំណងរបស់រដ្ឋាភិបាលជប៉ុន តាមរយ:មូលនិធិសមាណហរណកម្មជប៉ុន-អាស៊ាន (JAIF) និងមានការចូលរួមថវិកាបដិភាគពីរាជរដ្ឋាភិបាលកម្ពុជា។ មូលធិនិ JAIF ត្រូវបានបង្កើតឡើងនៅក្នុងកិច្ចប្រជុំកំពូលអាស៊ាន-ជប៉ុន កាលពីថ្ងៃទី២៦ ខែធ្នូ ឆ្នាំ២០០៧ ដើម្បីជួយអភិវឌ្ឍន៍ហេដ្ឋារចនាសម្ព័ន្ធ និងសម្របសម្រួលពាណិជ្ជកម្ម នៅក្នុងប្រទេសតំបន់ទន្លេមេគង្គ៕

មតិយោបល់