លោក Alfred Riedl គ្រូបង្វឹកក្រុមបាល់ទាត់ជម្រើសជាតិឥណ្ឌូនស៊ី ថាក្រុមរបស់លោកនឹងប្រឹងប្រែងខ្លាំងបំផុត ដើម្បីបង្កើតប្រវត្តិសាស្ត្រយកឈ្នះថៃ លើកពាន AFF Suzuki Cup នៅឆ្នាំនេះ។
ក្រុមឥណ្ឌូនស៊ី នឹងត្រូវប្រកួតវគ្គផ្ដាច់ព្រ័ត្រជើងទី១ ជាមួយក្រុមការពារតំណែងជើងឯកថៃ នៅល្ងាចថ្ងៃពុធនេះ នៅទឹកដីរបស់ឥណ្ឌូនស៊ីផ្ទាល់តែម្ដង។ មុនការប្រកួតនេះចាប់ផ្ដើម លោក Alfred បានបង្ហាញចំណាប់អារម្មណ៍ថា៖ “យើងកំពុងលេងជាមួយក្រុមខ្លាំងនៅអាស៊ាន ដូច្នេះយើងដឹងថាពិតជាពិបាកខ្លាំងណាស់ ប៉ុន្តែយើងនឹងបង្កើតប្រវត្តិសាស្ត្រ ហើយឈ្នះវាឱ្យបាននៅឆ្នាំនេះ។ យើងមានគុណសម្បត្តិព្រោះជើងទី១យើងលេងនៅដីរបស់យើង ជាមួយអ្នកគាំទ្រដ៏អស្ចារ្យ”។
ឥណ្ឌូនស៊ី បានធ្វើឱ្យគេភ្ញាក់ផ្អើលមែនទែន ក្នុងពានរង្វាន់ Suzuki Cup នេះ ព្រោះសហព័ន្ធបាល់ទាត់មួយនេះត្រូវបានគេពិន័យមិនឱ្យពាក់ព័ន្ធនិងបាល់ទាត់តាំងពីឆ្នាំ២០១៤មកហើយ។ ដូច្នេះមានន័យថាការចូលលេងពានរង្វាន់នេះ គឺពួកគេមិនបានប្រកួតមិត្តភាពអ្វីច្រើនដូចក្រុមប្រទេសដទៃទៀតទេ។
នេះជាលើកទី៥ហើយ ដែលក្រុមឥណ្ឌូនស៊ីបានឡើងដល់វគ្គផ្ដាច់ព្រ័ត្រ ប៉ុន្តែក្នុងចំណោមទាំង៤ដងនៅឆ្នាំ ២០០០ ២០០២ ២០០៤ និង២០១០ កន្លងមកនោះ មិនដែលទទួលបានជើងឯកម្ដងណាទេ៕
មតិយោបល់