Kiatisuk Senamuang គ្រូបង្វឹកក្រុមបាល់ទាត់ជម្រើសជាតិថៃបាននិយាយថាការឈ្នះពានរង្វាន់ AFF Suzuki Cup 2016 នេះ គឺដើម្បីជាការអបអរការឡើងកាន់តំណែងរបស់ស្ដេចថ្មីនៃប្រទេសថៃ Maha Vajiralongkorn ក៏ដូចជាអ្នកគាំទ្រសម្រាប់ឆ្នាំថ្មី។
ក្រុមថៃបានយកឈ្នះឥណ្ឌូនេស៊ី ២-០ ក្នុងជើងទី២វគ្គផ្ដាច់ព្រ័ត្រ ក៏ដូចជាឈ្នះ ៣-២ ដោយគិតបូកទាំងជើងទី១ ដើម្បីលើកពានរង្វាន់ AFF Suzuki Cup 2016 ជាលើកទី៥របស់ខ្លួន ក៍ដូចជាបង្កើតប្រវត្តិសាស្ត្រជាក្រុមឈ្នះពានរង្វាន់ក្នុងតំបន់អាស៊ាននេះបានច្រើនជាងគេ។
ក្នុងឱកាសឈ្នះពាននេះដែរ លោក Kiatisuk បាននិយាយដូច្នេះទៀតថា៖ “យើងយកពាននេះ ដើម្បីអបអរស្ដេចថ្មីរបស់យើង យើងយកពាននេះដើម្បីជូនអ្នកគាំទ្ររបស់យើងសម្រាប់ឆ្នាំថ្មី ហើយពានមួយនេះក៏សម្រាប់ជូនដំណើរព្រះបាទBhumibol Adulyade ទៅកាន់កន្លែងស្ងប់សុខផងដែរ។ ខ្ញុំទទួលបានការផ្ដល់យោបល់ជាច្រើនពីសំណាក់អ្នកគាំទ្រ ហើយខ្ញុំចង់នាំក្រុមនេះទៅមុខ និងចង់ឱ្យអ្នកគាំទ្រទុកចិត្តខ្ញុំ”។
ក្រុមបាល់ទាត់ជម្រើសជាតិថៃនៅមានភារកិច្ចធំមួយនៅព្រឹត្តិការណ៍ជម្រុះពានរង្វាន់ FIFA World Cup 2018 ដោយស្ថិតក្នុងពូលជាក្រុមខ្លាំងៗជាច្រើននៅទ្វីបអាស៊ីនេះ។ ដោយបច្ចុប្បន្នពួកគេបានអស់ឱកាសឡើងទៅវគ្គបន្ដហើយ តែក៏នៅសល់ប្រកួតច្រើនទៀតដែរ៕
មតិយោបល់