លោក John Aldridge វិរបុរសរបស់ក្លឹប Liverpool បាននិយាយថាលោក Jurgen Klopp គួរតែពិចារណាទិញខ្សែប្រយុទ្ធ Luis Suarez ពីក្លឹប FC Barcelona មកវិញ ប្រសិនបើចង់ជោគជ័យនៅលីគអង់គ្លេស។
ខ្សែប្រយុទ្ធជម្រើសជាតិអ៊ុយរុយហ្គាយខាងលើបានចាកចេញពី Liverpool ទៅលេងនៅក្លឹប Barcelona កាលពីឆ្នាំ២០១៤កន្លងទៅ ក្នុងតម្លៃខ្លួន៧៥លានផោន ក្រោយពីកីឡាកររូបនេះសឹងតែជិតនឹងជួយក្រុមហង្សក្រហមបានលើកពានទៅហើយ។ យ៉ាងណាមិញ ការចាកចេញរបស់ Suarez ពិតជាធ្វើឱ្យក្រុមហង្សក្រហមរាងពិបាកបន្តិចមែនក្នុងការស្វែងរកខ្សែប្រយុទ្ធថ្មីមកពង្រឹងក្រុមឡើងវិញ បើទោះជាប្រាក់ដែលលក់បានមានចំនួនច្រើនក៏ពិតមែន។
ស្របពេលនិងការខកខានលើកពានអស់រយៈពេលជាយូរមកហើយនោះ អតីតកីឡាករ John Aldridge ដែលធ្លាប់លេងឱ្យក្រុម Liverpool ដែរនោះ មើលឃើញថាក្រោមការដឹកនាំរបស់លោក Klopp គឺក្រុមមានសមត្ថភាពអាចលើកពានបាន ប្រសិនបើមានតំបន់ប្រយុទ្ធល្អ។ ដូច្នេះហើយ បានជាលោកគិតថាក្រុមមួយនេះ គួរតែទិញយក Suarez មកវិញ ប្រសិនបើមានបំណងចង់លើកពានពិតប្រាកដមែន។
“អ្នកចាត់ការត្រូវដឹងថាគាត់នឹងត្រូវទិញនរណា ប៉ុន្តែបើមិនអាចទិញត្រូវមនុស្សទេនោះ គួរតែប្រើក្មេងៗវិញល្អជាង។ យើងមានលុយគ្រប់គ្រាន់ ប៉ុន្តែគាត់បែរជាមិនចេញទៅក្រៅរកទិញទៅវិញ។ សម្រាប់ខ្ញុំ ខ្ញុំនឹងទៅទិញយក Suarez ត្រលប់មកវិញ”។ សម្ដីរបស់លោក Aldridge ៕
មតិយោបល់