មុនលីគកំពូលកម្ពុជារដូវកាលថ្មីចូលមកដល់នាខែកុម្ភ: ក្លឹបបាល់ទាត់ក្រសួងការពារជាតិ ( ទ័ព ) បានតម្លើងប្រាក់ខែ៥០%បន្ថែម ដល់កីឡាករខ្មែរ ដើម្បីជាការលើកទឹកចិត្តឈានទៅសម្រេចគោលដៅយកចំណាត់ថ្នាក់២ក្រុមល្អជាងគេក្នុងលីគ។

ក្នុងសន្និសីទកាលពីម្សិលមិញ អ្នកចាត់ការទូទៅក្លឹបលោក ខូវ ឆាយ បាននិយាយថាតាមពិតក្លឹបមានគម្រោងបន្ថែមនេះយូរមកហើយ ទើបតែរដូវកាលនេះមានការទំនុងបម្រុងពីក្រុមហ៊ុនឯកជនច្រើន និងឯកភាពពីថ្នាក់លើទើបក្លឹបសម្រេចផ្តល់ជូនកីឡាករតែម្តង។

« តាមពិតទៅយើងចង់បន្ថែមប្រាក់ខែពាក់កណ្តាលនេះយូរមកហើយ ប៉ុន្តែទើបតែថ្មីៗនេះមានក្រុមហ៊ុនឧបត្ថម្ភច្រើន និងថ្នាក់លើយល់ព្រម ទើបយើងតម្លើង ដើម្បីលើកកម្ពស់ជីវភាពកីឡាករ ធ្វើម៉េចឲ្យគាត់មានឆន្ទ:ប្រកួតកាន់តែខ្ពស់។ » សម្តីលោក ខូវ ឆាយ។

លោកបន្តថា ជាយុទ្ធសាស្ត្រសម្រាប់ឆ្នាំថ្មីគឺទ័ពចង់បានចំណាត់ថ្នាក់ Top2 ដើម្បីឈានទៅប្រកួតនៅឆាកអន្តរជាតិ កម្រិតតំបន់ដូចជា AFC CUP និង Toyota Cup ជាដើម។

ល្ងាចនេះ ក្រសួងការពារជាតិ(ទ័ព) នឹងប្រកួតមិត្តភាពតទល់ក្លឹបនៅលីគកំពូលម៉ាឡេស៊ី Melaka FC វេលាម៉ោង ៦:៤៥នាទី នៅពហុកីឡដ្ឋានជាតិ ដោយមានការផ្សាយផ្ទាល់លើទំព័រ Post Sport។