លោក Rafa Benitez គឺជាបេក្ខភាពដែលគេមើលឃើញថាអាចនឹងជំនួសលោក Arsene Wenger បាននៅក្លឹប Arsenal ក្រោយពីតាបារាំងម្នាក់នេះដឹកនាំក្រុមកាន់តែដុបដាបខ្លាំងនៅរដូវកាលនេះ។
បរាជ័យ ៥-១ ក្រោមថ្វីជើងរបស់ Bayern Munich ក្នុងពានរង្វាន់ Champions League ជើងទី១នោះ បានធ្វើឱ្យកៅអីរបស់លោក Wenger កាន់តែក្ដៅឡើងហើយ ស្របពេលដែលការដឹកនាំរបស់លោកនៅលីគអង់គ្លេសក៏មិនទាន់បានល្អដែរនោះ។ ដោយឡែកអ្នកគាំទ្រវិញ ក៏មានបំណងចង់បានអ្នកចាត់ការថ្មីមកដឹកនាំក្រុមដែរ ត្បិតអីអ្នកចាត់ការបច្ចុប្បន្នដឹកនាំក្រុមអស់ពេលជាច្រើនឆ្នាំហើយ តែមិនទាន់ទទួលបានផ្លែផ្កាច្រើនដូចអ្វីដែលចង់បានសោះ។
បុរសដែលត្រូវបានគេរំពឹងថានឹងអាចជំនួសលោក Wenger បាននោះ គឺលោក Benitez ដែលកំពុងតែដឹកនាំក្រុម Newcastle United លេងនៅលីគទី២របស់អង់គ្លេស។ អតីតអ្នកចាត់ការក្រុម Real Madrid រូបនេះបាននិយាយថាខ្លួនក៏មានបំណងចង់ដឹកនាំក្រុមកាំភ្លើងធំដែរ ប៉ុន្តែបច្ចុប្បន្នត្រូវផ្ដោតអារម្មណ៍លើក្រុម Newcastle សិន ដើម្បីធ្វើយ៉ាងណាឱ្យពួកគេបានឡើងមកលេងនៅលីគកំពូលវិញ៕
មតិយោបល់