លោក Jurgen Klopp មើលឃើញថាក្រុមរបស់ខ្លួនអាចនឹងប្រឈមការមិនបានចូលលេងពាន UEFA Champions League ទៀតនៅរដូវកាលក្រោយនេះ បន្ទាប់ពីការប្រជែង Top4 កំពុងតែក្ដៅគគុកនៅអង់គ្លេស។
Liverpool បានបាត់បង់តំណែងប្រជែងពានរង្វាន់ Premier League ហើយ ក្រោយពីយកឈ្នះបានក្រុមខ្លាំងៗជាច្រើន ប៉ុន្តែពេលប៉ះជាមួយក្រុមខ្សោយបែរជាទទួលបានលទ្ធផលមិនល្អទៅវិញ។ ទន្ទឹមគ្នានឹងនេះដែរ លោក Klopp កំពុងតែបារម្ភចំពោះក្រុមទាំងមូលហើយ ដោយអាចនឹងមិនបានលេងពាន Champions League ទៀត ប្រសិនណាបើពួកគេមិនអាចរក្សាទម្រង់លេងល្អយកឈ្នះការប្រកួតនៅសល់ក្នុងដៃទេនោះ។
“ច្បាស់ណាស់ វានៅក្នុងដៃពួកយើងនាពេលបច្ចុប្បន្ននេះ ប៉ុន្តែខ្ញុំគិតថាយើងត្រូវប្រឈមបញ្ហាច្រើនដើម្បីសម្រេចគោលដៅបានលេង Champions League វិញ។ អ្នកគាំទ្រពិតជាអស់សង្ឃឹមលើយើង ប្រសិនបើយើងមិនអាចធ្វើបាន ប៉ុន្តែខ្ញុំនៅតែបារម្ភចំពោះការមិនឈានដល់គោលដៅដដែល។ Top4 កំពុងតែមានការប្រជែងខ្លាំង ខណៈដែលក្រុមរបស់យើងលេងមិនល្អសោះ ពេលប៉ះក្រុមខ្សោយៗនៅខាងក្រោម”។ សម្ដីអ្នកចាត់ការសញ្ជាតិអាល្លឺម៉ង់។
Liverpool បច្ចុប្បន្នកំពុងតែឈរនៅចំណាត់ថ្នាក់លេខ៤ក្នុងតារាង ដោយមាន៥២ពិន្ទុក្នុង២៧ប្រកួត ខណៈដែលក្រុម Arsenal នៅលេខ៥ មាន៥០ពិន្ទុក្នុង២៦ប្រកួត និង Manchester United មាន៤៩ពិន្ទុ ឈរលេខ៦ក្នុង២៦ប្រកួត៕
មតិយោបល់