ផ្ទះ ព័ត៌មានកីឡា អាហ្សង់ទីន ដេ...

អាហ្សង់ទីន ដេញគ្រូបង្វឹកចេញ បន្ទាប់ពីដឹកនាំបានត្រឹម ៨ប្រកួត

0

ក្រុមបាល់ទាត់ជម្រើសជាតិ អាហ្សង់ទីន បានដេញគ្រូបង្វឹករបស់ពួកគេ គឺលោក Bauza ចេញពីតំណែង បន្ទាប់ពីដឹកនាំក្រុមអាហ្សង់ទីន មិនទទួលបានជោគជ័យនៅក្នុងការប្រកួតជម្រុះពានរង្វាន់ World Cup ២០១៨ នៅប្រទេសរុស្សី។

ក្រុមជើងខ្លាំងអាហ្សង់ទីន បានសម្រេចចិត្តក្នុងការបណ្តេញគ្រូបង្វឹក ដែលទើបនឹងដឹកនាំក្រុមជម្រើសជាតិ បានត្រឹម ៨ប្រកួតប៉ុណ្ណោះ។ ការសម្រេចចិត្តបែបនេះ គឺធ្វើឡើង បន្ទាប់ពីលោក Bauza ដឹកនាំក្រុមអាហ្សង់ទីន មិនបានល្អឡើយ ចាប់តាំងពីការឡើងមកកាន់តំណែងជាគ្រូបង្វឹកកាលពីខែសីហា កន្លងមក។ នៅក្នុង ៨ប្រកួតក្រោមការដឹកនាំរបស់លោក Bauza​ ឈ្នះ៣ប្រកួត ស្មើ២​ និងចាញ់៣ប្រកួត។ ម្យ៉ាងវិញទៀត នៅក្នុងការប្រកួតជម្រុះ World Cup ២០១៨ ដែលនឹងប្រព្រឹត្តទៅនៅប្រទេសរុស្សីនោះ អាហ្សង់ទីនកំពុងប្រឈម នឹងវិបត្តិយ៉ាងខ្លាំង។ មកទល់នឹងពេលនេះ អាហ្សង់ទីនកំពុងឈរនៅលេខរៀងទី៥ មាន២ ពិន្ទុប៉ុណ្ណោះលើក្រុមលេខរៀងទី៦ ដែលជាការព្រួយបារម្ភយ៉ាងខ្លាំង សម្រាប់ក្រុមជម្រើសជាតិអាហ្សង់ទីន។

ការបណ្តេញលោក Bauza ចេញនេះ ត្រូវបានធ្វើឡើង នៅក្រោយពេលអាហ្សង់ទីន ប្រកួតចាញ់ ប៉ូលីវៀ ២-០ និងក្រោមការសម្រេចចិត្តយ៉ាងច្បាស់លាស់ពីសហព័ន្ធបាល់ទាត់អាហ្សង់ទីន។ យ៉ាងណាវិញនោះដែរ គេមិនទាន់ដឹងថា អ្នកណាម្នាក់ត្រូវបន្តតំណែងពីលោក Bauza ឡើយ ហើយអាហ្សង់ទីន ត្រូវការប្រកួតបន្តទៀត ក្នុងយុទ្ធនាការជម្រុះ World Cup ២០១៨ ដើម្បីធានាកៅអីទៅកាន់ប្រទេសរុស្សី ខណ:ដែលអាហ្សង់ទីន អវត្តមាន Lionel Messi ចំនួន៤ប្រកួត ដោយការពិន័យពីសហព័ន្ធ៕

មតិយោបល់