លោក Arsene Wenger កំពុងតែត្រូវប្រឈមជាមួយនឹងបញ្ហាអនាគត់របស់គាត់នៅ Arsenal ក្រោយបញ្ខប់ការប្រកួតផ្តាច់ព្រ័ត្រ FA Cup ជាមួយ Chelsea នៅថ្ងៃទី ២៧ ខាងមុខនេះ។

FA Cup គឺជាគ្រាប់អុកមួយយ៉ាងសំខាន់សម្រាប់លោក Arsene Wenger អ្នកចាត់ការទូទៅរបស់ក្រុមកាំភ្លើងធំ Arsenal។ ជាការពិតណាស់ ប្រសិនបើក្រុមកាំភ្លើងធំអាចឈ្នះពានរង្វាន់ FA Cup នោះវានឹងក្លាយជាពានសម្រាប់លួងចិត្តអ្នកគាំទ្រទាំងអស់ក្នុងការគាំទ្រឲ្យលោក Arsene Wenger បន្តដឹកនាំ Arsenal ទៀត។​

ដូច្នេះហើយ លោក Arsene Wenger ត្រូវតែរកនូវពានរង្វាន់មួយសម្រាប់លួងចិត្តអ្នកគាំទ្រ ដើម្បីរក្សាកៅអីអ្នកចាត់ការទូទៅ​ នៅ Arsenal បន្តទៀត។ អ្នកគាំទ្រក្រុមកាំភ្លើងធំ ហាក់មិនពេញចិត្តចំពោះការដឹកនាំរបស់អ្នកចាត់ការសញ្ជាតិបារាំងរូបនេះឡើយ ព្រោះថា ក្រោមការដឹកនាំរបស់គាត់ ក្លិបមិនទាន់ទទួលបានជោគជ័យធំដុំឡើយក្រៅពីកៅអី Champion League ដោយមិនដែលឈ្នះ។ ម្យ៉ាងវិញទៀត រដូវកាលក្រោយ Arsenal ត្រូវធ្លាក់ទៅលេង Europa League ជាលើកដំបូងផងដែរ។

ហេតុនេះហើយ ការប្រកួត FA Cup គឺសំខាន់ខ្លាំងណាស់សម្រាប់លោក Arsene Wenger ព្រោះថា បើ Arsenal ឈ្នះគាត់អាចបន្តនៅដឹកនាំក្លិប តែបើចាញ់វិញ កៅអីជាអ្នកចាត់ការតាំងពីឆ្នាំ ១៩៩៦ របស់លោកត្រូវបានបញ្ចប់។