ខ្សែប្រយុទ្ធនៃក្លិបអគ្គស្នងការនរគបាលជាតិ នួន បូរី ខិតខំហ្វឹកហាត់ខ្លាំងណាស់ ដើម្បីបានជាប់ជម្រើសជាតិឡើងវិញ ហើយការប្រឹងប្រែងនេះពិតជាបានសម្រេចមែន ក្រោយពីលោក Leonardo Vitorino បានកោះហៅឲ្យចូលរួមជាមួយក្រុមជម្រើសជាតិកម្ពុជា សំរាប់ការប្រកួតមិត្តភាពអន្តរជាតិជាមួយ ឥណ្ឌូនេស៊ី នៅថ្ងៃទី ០៨ ខែមិថុន និងពានរង្វាន់ជម្រុះ AFC Asian Cup 2019 ។
កីឡាករដើមកំណើតមកពីខេត្តកណ្តាលបានលើកឡើងថា៖ « ខ្ញុំសប្បាយចិត្តខ្លាំងណាស់ដែលមានឈ្មោះក្នុងក្រុមជម្រើសជាតិវិញ ក្រោយខកខានដោយសាររបួសសសៃពួរក្នុងឆ្នាំ ២០១៥ ហើយបើថាបានលេងជម្រើសដំបូងរឺក៏អត់គឺខ្ញុំមិនទាន់ ដឹងនោះទេ អ្វីដែលខ្ញុំត្រូវធ្វើពេលនេះគឺមានតែការខិតខំប្រឹងប្រែងហ្វឹកហាត់ មិនថានៅក្លិបរឺក្នុងក្រុមជម្រើសជាតិតែប៉ុនណ្ណោះ » ។
អតីតកីឡាករឆ្លាមសមុទ្រក្នុងអំឡុងឆ្នាំ ២០១០ រូបនេះនឹងត្រូវបង្ហាញសមត្ថភាពជាមួយសមាជិកក្រុមគោព្រៃកម្ពុជាក្នុងការហ្វឹកហាត់ដើម្បីទាក់ចិត្តគ្រូបង្វឹក Leonardo Vitorino ក្នុងការប្រជែងជម្រើស ១១ នាក់ ជាមួយ ខ្សែប្រយុទ្ធ ៥ នាក់ផ្សេងទៀត ដូចជា កែវ សុខងន ,កែវ សុខផេង , ចាន់ វឌ្ឍនាកា , សារី ម៉ាត់ណូរូទីន , និង ឃួន ឡាបូរ៉ាវី ជាដើមសម្រាប់ការប្រកួតនាពេលខាងមុខនេះ។
សូមរំលឹកថា នួន បូរី ធ្លាប់ជាប់ជម្រើសជាតិយុវជនអាយុក្រោម ២១ ឆ្នាំ កាលពី ២០១១ ហើយបន្តជាប់ជម្រើសជាតិឈុតធំទៀត រហូតដល់ឆ្នាំ ២០១៥ ទើបរបួស
ពេលទៅប្រកួតមិត្តភាពជាមួយប្រទេស ព្រុយណេ ក៏មិនអាចលេងបានទាំងក្លិប និង ជម្រើសជាតិ៕
មតិយោបល់