អង់គ្លេស: កាលពីល្ងាចម្សិលមិញនេះ ក្លឹបបិសាចក្រហម Manchester United បានប្រកាសដកតំណែងរបស់លោក Louis van Gaal ចេញពីអ្នកចាត់ការក្រុមហើយ ដោយរំពឹងថានឹងយកលោក Jose Mourinho មកជំនួសវិញ។

តើមានហេតុផលអ្វីខ្លះដែលនៅពីក្រោយ ការបណ្ដេញលោក Van Gaal ចេញពីតំណែង ខណ:ដែលលោកទើបតែដឹកនាំក្រុមលើកពាន FA Cup កាលពីអាទិត្យមុននេះ?

ខាងក្រោមនេះជាហេតុផល ៥យ៉ាងដែលខាង Football.com វិភាគហើយ៖
១. ការប្រើទម្រង់លេងមិនត្រឹមត្រូវ
ក្រោមការដឹកនាំរបស់លោក Van Gaal ភាគច្រើនបិសាចក្រហមប្រើទម្រង់ 4-2-3-1 ដែលទម្រង់នេះចំហរច្រើននៅតំបន់កណ្ដាល ហើយការវាយសម្រុកក៏មិនសូវជាបានផលដែរ ព្រោះទម្រង់ថ្មីនេះតម្រូវឱ្យកីឡាករ របស់បិសាចក្រហមផ្លាស់ប្ដូរ Role លេង។ ជាធម្មតាប្រសិនបើលោកប្រើទម្រង់ 4-3-3 ឬ 4-1-4-1 អាចមានប្រសិទ្ធភាពច្រើនជាង ហើយអាចនឹងជោគជ័យផងដែរ។

២. ការលក់ Angel di Maria ទៅ PSG
គ្មាននរណាម្នាក់សោកស្ដាយចំពោះរដូវកាលដំបូងរបស់ Di Maria ដែលធ្វើមិនបានល្អនោះទេ បើទោះបីជាគេរកបានតែ៤គ្រាប់ក្នុង៣២ប្រកួតក៏ដោយ។ អតីតកីឡាករ Real Madrid រូបនេះមានទេពកោសល្យខ្ពស់ ដែលអាចជ្រោមជ្រែងតំបន់ប្រយុទ្ធបានច្រើន ប្រសិនបើលោក Van Gaal ដាក់ត្រូវទម្រង់លេង។ មួយវិញទៀត ខ្សែបម្រើជម្រើសជាតិអាហ្សង់ទីនរូបនេះអាចថាជាកីឡាករដែលដឹងពីការលេងនៅក្លឹបធំៗក៏ថាបាន ព្រោះរូបគេបានប្រើពេល៤ឆ្នាំជាមួយក្រុម Real Madrid បានយ៉ាងជោគជ័យ។ ការលក់ Di Maria ចេញនេះហើយ ទើបបណ្ដាលឱ្យស្លាបរបស់ Man Utd ហាក់ដូចជាគ្មានទម្រង់ល្អនោះទេក្នុងរដូវកាលនេះ។

៣. ការស្ដីបន្ទោសកីឡាករនៅទីសាធារណ:
Wayne Rooney , Phil Jones , Smalling និង Robin van Persie សុទ្ធតែធ្លាប់ត្រូវរងការអាម៉ាស់ដោយសារតែពាក្យសម្ដីរបស់ Van Gaal បន្ទោសខ្លួនដោយបើកចំហរ។ វាអាចជាកំហុសធំមួយសម្រាប់អ្នកដឹកនាំក្រុមដែលប្រើសម្ដីមិនល្អដល់កូនក្រុម ធ្វើឱ្យសមាជិកក្រុមដទៃទៀតវាយតម្លៃបាន។

៤. ការបាត់បង់ខ្សែប្រយុទ្ធមានបទពិសោធន៍ច្រើនឆ្នាំជាមួយ Man Utd
ពេលដែល Van Gaal លក់ Van Persie និង Javier Hernandez ទៅឱ្យ Fenerbahce និង Bayer Leverkusen កាលពីរដូវក្ដៅមុននេះ មានការអាក់អន់ចិត្តជាច្រើនដល់អ្នកគាំទ្រក្រុមបិសាចក្រហម។ Van Persie ជាខ្សែប្រយុទ្ធល្អម្នាក់ តាំងពីលោក Sir Alex នៅម្ល៉េះ ខណ:ដែល Javier វិញ ក៏ដូចគ្នា ដោយគ្រាន់តែលក់គេទៅដល់ Leverkusen ភ្លាម កីឡាកររូបនេះស៊ុតមិនប្រណីជើងនោះទេ។ ត្បិតតែការលក់ចេញនេះ អាចនាំ Anthony Martial ត្រលប់មកវិញមែន ប៉ុន្តែសម្រាប់រដូវកាលដំបូងរបស់កីឡាករជម្រើសជាតិបារាំងរូបនេះ ហាក់ដូចមិនទាន់ជាពេញល្អសម្រាប់បិសាចក្រហមឡើយ។

៥. បាត់បង់ឱកាសលេង Champions League
ការបាត់បង់ឱកាសលេង UEFA Champions League គឺជារឿងអាក្រក់មួយសម្រាប់ក្រុមធំដូចជា Manchester United នេះ ព្រោះពួកគេត្រូវការជាចាំបាច់សម្រាប់ការទៅលេងពានមួយនេះ។ ខណ:ដែលរដូវកាលនេះឱកាសមែនដែរសម្រាប់លោក Van Gaal ប៉ុន្តែបែរជាភ្លាត់ប៉ុន្មានប្រកួតចុងក្រោយទៅវិញ។ ការចំណាយច្រើនចំពោះការទិញកីឡាករ ប៉ុន្តែមិនបានទៅលេង Champions League គឺជារឿងមិនល្អនោះទេសម្រាប់ Manchester United៕