Zinedine Zidane អ្នកចាត់ការក្រុម Real Madrid នៅតែមានទំនុកចិត្តថាការដាក់ឱ្យ Gareth Bale, Karim Benzema និង Cristiano Ronaldo បានលេងជាមួយគ្នា គឺជាទម្រង់ប្រយុទ្ធល្អបំផុតរបស់ក្រុមខ្លួននៅរដូវកាលនេះ។
BBC ទើបតែបានចូលលេងពេញជើងជាមួយគ្នាកាលប៉ះជាមួយ Napoli ជើងទី២ពានរង្វាន់ UEFA Champions League កន្លងទៅ ប៉ុន្តែពួកគេមិនអាចរកគ្រាប់បាល់បានឡើយ ដោយទម្រង់លេងត្រូវបានអ្នកគាំទ្រគិតថាមិនទាន់ស៊ីចង្វាក់គ្នានៅឡើយ។ យ៉ាងណាមិញ ឆ្លើយទៅនឹងការលើកឡើងនេះដែរ Zidane គិតថាការប្រកួតនោះគឺ Real មានទម្រង់ប្រយុទ្ធល្អណាស់ ហើយក៏ជឿជាក់ថា BBC លេងជាមួយគ្នា ប្រាកដជាល្អបំផុតសម្រាប់ក្រុម។
“Bale, Benzema និង Ronaldo អាចមានម្នាក់ទៅលេងនៅតំបន់បម្រើបាន ប៉ុន្តែខ្ញុំចូលចិត្តដាក់ឱ្យពួកគេទាំង៣នាក់លេងនៅតំបន់ប្រយុទ្ធវិញ។ ជាការពិតដែល Bale អាចលេងនៅតំបន់បម្រើបាន ប៉ុន្តែខ្ញុំចូលចិត្តគាត់លេងប្រយុទ្ធ គាត់លេងនៅប្រយុទ្ធស្លាបឆ្វេង ហើយ Ronaldo ទៅខាងស្ដាំ Benzema នៅកណ្ដាល។ នេះជាអ្វីដែលយើងធ្វើកន្លងមក”។ សម្ដី Zidane ។
នៅយប់ស្អែកនេះ ក្រុម Real Madrid នឹងត្រូវតតាំងជាមួយក្រុម Real Betis ក្នុងពានរង្វាន់ La Liga វិញម្ដង ដោយការប្រកួតនេះនឹងលេងដោយមិនមានវត្តមានរបស់ Bale នោះទេ ព្រោះរូបគេទទួលបានកាតក្រហមកាលពីប្រកួតកន្លងទៅ៕
មតិយោបល់