ខ្សែប្រយុទ្ធ Zlatan Ibrahimovic បានផ្តល់ឱកាសដល់ខ្សែប្រយុទ្ធចំណូលថ្មី Romelu Lukaku នូវការពាក់អាវលេខ ៩ ដែលជាលេខអាវរបស់គេ ក្នុងពេលដែលមិនទាន់ជាពីរបួសនៅឡើយ។

បើតាមការចុះផ្សាយរបស់ The Sun បានឲ្យដឹងថា Zlatan Ibrahimovic ដែលមិនទាន់ជាពីរបួសនៅឡើយនោះ បានយល់ព្រមឲ្យ Lukaku ពាក់អាវស្លាកលេខ ៩ ក្នុងរដូវកាលថ្មីនេះ។ ជាការពិតណាស់ Zlatan នឹងត្រូវមកលេងឲ្យក្រុម Man Utd នៅខែតុលាខាងមុខនេះ ក្រោយពីរបួសរបស់គេ បានជាសះស្បើយនោះ។ ម្យ៉ាងវិញទៀត ខ្សែប្រយុទ្ធ ស៊ុយអ៊ែតរូបនេះ បានសម្រេចចិត្តបន្តកុងត្រាថ្មីជាមួយក្រុមបីសាចក្រហម Manchester United បន្តទៀត។

អ្វីដែលសំខាន់នោះ Zlatan បានប្រគល់អាវលេខ ៩ ទៅឲ្យខ្សែប្រយុទ្ធចំណូលថ្មី Romelu Lukaku ដែលបានបង្កើតនូវបន្ទិលសង្ស័យមួយថា តើ Zlatan Ibrahimovic នឹងពាក់អាវលេខប៉ុន្មានវិញ? តាមរយៈ The Sun ដដែលបានឲ្យដឹងថា ក្រុមបីសាចក្រហម Manchester United បានត្រៀមអាវស្លាកលេខ ១០ ឲ្យ Zlatan Ibrahimovic ក្រោយពីការចាកចេញរបស់ប្រធានក្រុម Wayne Rooney ទៅកាន់ក្រុម Everton ។

ដូច្នេះហើយ Zlatan Ibrahimovic នឹងទទួលបានអាវលេខ ១០ ឡើងវិញ ដែលធ្លាប់ពាក់នៅក្រុម Paris Saint Germain និង ក្រុមជម្រើសជាតិស៊ុយអ៊ែត។