ក្រុម Real Madrid បានសម្រេចចិត្ត ក្នុងការលក់ខ្សែប្រយុទ្ធ Gareth Bale ដើម្បីទិញយកកីឡាករវ័យក្មេងបារាំង Kylian Mbappe ពីក្រុម AS Monaco ។

បើតាម Mirror បានឲ្យដឹងថា Real Madrid នឹងលក់ខ្សែប្រយុទ្ធ Gareth Bale នៅរដូវក្តៅនេះហើយ ដើម្បីសន្សំលុយបន្ថែម ក្នុងការទិញយក Kylian Mbappe ពីក្រុមជើងឯកបារាំង Monaco ។ ការលក់ Bale នេះមិនមែនមានន័យថា Real Madrid មិនមានលុយគ្រប់គ្រាន់ ក្នុងការនាំយក Mbappe ឡើយ តែនេះគ្រាន់តែជាការកាត់បន្ថយការចំណាយរបស់ក្លិប កុំឲ្យ មានទំហំធំធេងពេក។ ម្យ៉ាងវិញទៀត លោក Zidane ដែលជាអ្នកចាត់ការក្រុម Real Madrid ក៍ធ្លាប់បានប្រាប់ ទៅកាន់ Mbappe កាលពីពេលកន្លងមកថា វត្តមានរបស់ខ្សែប្រយុទ្ធបារាំងវ័យ ១៨ឆ្នាំរូបនេះ នឹងមកជំនួសម្នាក់ក្នុងចំណោម BBC ដែលមាន Bale, Benzema និង Ronaldo ។

ខណ:ពេលនេះដែរ លទ្ធផលបានចេញជាផ្លូវការហើយ ព្រោះថា Real Madrid បានសម្រេចចិត្តលក់ ខ្សែប្រយុទ្ធ​ Gareth Bale ហើយ ដើម្បីយកលុយទៅទិញ Kylian Mbappe ។ ដូច្នេះហើយ Gareth Bale អាចនឹងវិលទៅកាន់ Premire League វិញ ស្របពេល​ បីសាចក្រហម Manchester United កំពុងត្រៀមចាំត្រងយកខ្សែប្រយុទ្ធសញ្ជាតិវែលរូបនេះ។ ក្រៅពី Man Utd នៅមានក្លិបជាច្រើនទៀត ដែលចង់បាន Bale រួមមានដូចជា Paris Saint Germain និងក្លិបនៅចិនជាដើម កំពុងទន្ទឹងរង់ចាំខ្សែប្រយុទ្ធរូបនេះ។

យ៉ាងណាវិញ តាមប្រភពដដែលបានឲ្យដឹងថា បើ Real Madrid ពិតជាលក់ Gareth Bale មែននោះ កីឡាកររូបនេះ នឹងមកចូលរួមជាមួយបីសាចក្រហម Manchester United ។