ក្រុមតោខៀវ Chelsea ទទួលបានជោគជ័យ ក្នុងការនាំយកខ្សែបម្រើ Tiemoue Bakayoko ពីក្រុម AS Monaco ហើយ ក្រោយពីការតាមប្រមាញ់ មួយរយ:ពេលកន្លងមក។

នេះគឺជាបន្ថែមនូវសមាជិកថ្មីមួយរូបទៀត របស់ក្រុមតោខៀវ Chelsea សម្រាប់រដូវកាលថ្មីនេះ ដែលនឹងធ្វើឲ្យក្លិបមានការប្រែប្រួលច្រើន នាពេលខាងមុខនេះ។ ជាក់ស្តែងណាស់ កីឡាករ Tiemoue Bakayoko បានយល់ព្រមមកកាន់ Chelsea នៅក្នុងតម្លៃខ្លួនប្រមាណជា ៤០លានផោន ដែលជាតម្លៃថ្លៃលំដាប់ទី២ របស់ក្លិបបន្ទាប់ពីការទិញ Fernando Torres ក្នុងតម្លៃ ៥០លានផោន កាលពីឆ្នាំ ២០១១។ ក៍ប៉ុន្តែ Chelsea បានត្រៀមចំណាយទឹកប្រាក់ ខ្ពស់ជាងនេះទៀត ក្នុងការទិញកីឡាករ នារដូវក្តៅនេះ ដូចជា ៦១លានផោន សម្រាប់នាំយក Alex Sandro ពី Juventus និង ៦៥លានផោន ក្នុងការនាំយក Pierre-Emerick Aubameyang ពីក្រុម Dortmund ។

ចំពោះ ការមកកាន់ Chelsea របស់ Tiemoue Bakayoko អាចជាការបើកផ្លូវ ឲ្យខ្សែបម្រើ Nemanja Matic ចាកចេញផងដែរ ព្រោះថាកីឡាកររូបនេះ កំពុងទទួលបានការចាប់អារម្មណ៍ពី Man Utd និង Arsenal ។ ដូច្នេះហើយ Tiemoue Bakayoko នឹងចូលរួមហ្វឹលហាត់លើកដំបូងឲ្យ Chelsea នៅថ្ងៃនេះតែម្តង។