ក្រុម Juventus បានជោគជ័យ ក្នុងការនាំយកអ្នកចាំទីប៉ូឡូញ Wojciech Szczesny ពីក្រុមកាំភ្លើងធំ Arsenal ដើម្បីយកមកជំនួសតំណែងអ្នកចាំទីវ័យចំណាស់ Gianlugi Buffon ។

Juventus ដូចជាមិនទាន់ រកបានអ្នកចាំទីណាម្នាក់មកជំនួសតំណែង Buffon បាននៅឡើយទេ។ យ៉ាងណាវិញ ក្រុមសេះបង្កង់ Juventus បានសម្រេចចិត្តទិញយកអ្នកចាំទី របស់ក្រុមកាំភ្លើងធំ Arsenal កីឡាករ Wojciech Szczesny ក្នុងតម្លៃខ្លួន ១០លានផោន។ បើតាម Express News បានឲ្យដឹងថា ក្រុម Arsenal បានយល់ព្រម លក់អ្នកចាំទីប៉ូឡូញ នេះហើយ បន្ទាប់ពី Wojciech Szczesny ត្រូវបានខ្ចីជើងដោយក្រុម Roma អស់រយៈពេល ២ឆ្នាំកន្លងមកហើយ។ ម្យ៉ាងវិញទៀត Juventus មិនអាចឲ្យ Buffon លេងបន្តទៀតបានឡើយ ព្រោះថា វ័យរបស់អ្នកចាំទីរូបនេះ កាន់តែជ្រេណាស់ទៅហើយ ដែលទាមទាររកកីឡាករថ្មីណាម្នាក់មកជំនួសតំណែងរបស់គេ។

ជាការពិតណាស់ Juventus បានសម្លឹងមើល Wojciech Szczesny រយៈពេល ២ឆ្នាំមកហើយ ក្នុងពេលដែលរូបគេមកលេង ក្នុងល័ក្ខខ័ណ្ឌខ្ចីជើង របស់ Roma ។ ដូច្នេះហើយតម្លៃខ្លួន ១០លានផោន ដែល Juventus ទិញយក Wojciech Szczesny នោះ នឹងមិនខុសបំណងឡើយ ព្រោះថា ក្រុម Juventus បានដឹងច្បាស់ពីសមត្ថភាពរបស់អ្នកចាំទីប៉ូឡូញ នេះស្រាប់ហើយ។