ខ្សែការពារស្លាបស្តាំ ដែលក្រុម Paris Saint Germain ទើបតែទិញពីក្រុម Juventus កីឡាករ Dani Alves ពិតជាមិនធ្វើឲ្យក្លិបថ្មីខកបំណងឡើយ ដោយអាចរកបាន១គ្រាប់ ក្នុងចំណោមជ័យជម្នះលើក្រុម Monaco បានលើកពាន Super Cup។

ថ្វីបើវ័យកាន់តែចាស់ បន្តិចមែន តែសម្រាប់ទម្រង់លេងរបស់ Dani Alves ហាក់មិនប្រែប្រួលឡើយ គឺខ្សែការពារស្លាបរូបនេះ កាន់តែល្អពីមួយឆ្នាំ ទៅមួយឆ្នាំ។ ជាក់ស្តែងណាស់ ក្នុងការបង្ហាញខ្លួនលើកដំបូងក្នុងពាន Super Cup របស់បារាំង Dani Alves ធ្វើបានយ៉ាងល្អ ក្រោយពីព្យាយាមរកបាន១ គ្រាប់តាមស្មើលើក្រុម Monaco វិញនៅនាទីទី៥១។ ១គ្រាប់របស់ Alves នេះដែរ សម្រាប់នាំក្រុម Paris Saint Germain ឈ្នះពាន Super Cup នេះ ព្រោះថា ក្រុម Monaco បាននាំមុខមុន ១-០ តាំងពីតង់ទី១មក រហូតដល់ Alves រកបានគ្រាប់តាមស្មើ នៅនាទីទី ៥១ និង Rabiot រកបានគ្រាប់ជ័យជម្នះនៅនាទីទី ៦៣ ។

ដូច្នេះហើយ ក្រោយពីចប់ការប្រកួតនេះ Dani Alves បានដើរលើវិថីជោគជ័យ ជាមួយក្រុម Paris Saint Germain ទៀតហើយ ក្នុងការឈ្នះពានរង្វាន់ជាមួយក្លិប តាំងពី​នៅ Barcelona និង Juventus រហូតដល់មកកាន់ PSG ផងដែរ។ ម្យ៉ាងវិញទៀតនោះ Alves បានរកគ្រាប់បាល់ដំបូងឲ្យ ក្លិបថ្មីហើយ ក្រោយពីបង្ហាញខ្លួនបាន ៤ប្រកួតកន្លងមកនេះ។