នៅវេលាម៉ោង ៣រំលងអាធ្រាត្រយប់នេះ នឹងមានការប្រកួតដ៍ធំមួយរវាងក្រុម យក្សអេស្ប៉ាញទាំង២ Barcelona និង Real Madrid ក្នុងជំនួប Spanish Super Cup ជើងទី១ ។

ក្រុម Barcelona បានត្រៀមរួចរាល់ហើយ ក្នុងការបើកកីឡារដ្ឋាន ទទួលក្រុមយក្ស Real Madrid ក្នុងជំនួប Super Cup ជើងទី១នេះ។ Barcelona ដូចជាមិនមានបញ្ហាកីឡាករឡើយ ខណៈតំបន់ប្រយុទ្ធ Lionel Messi, Luis Suarez និង Gerrard Deulofeu មានវត្តមានទាំងអស់។ រីឯតំបន់កណ្តាល និងការពាររបស់ក្រុម Barcelona ពេញជើងទាំងអស់ ដែលមិនមានជាបញ្ហាចោទ សម្រាប់ក្រុមម្ចាស់ផ្ទះ Barcelona ឡើយ។ យ៉ាងណាវិញ សម្រាប់ក្រុម Real Madrid មានបញ្ហាតំបន់កណ្តាលបន្តិច ខណៈ Luka Modric ខ្សែបម្រើដែលពូកែអូសបាល់ និងកាឡុកក្នុងទីលាននោះ បានរងរបួស។ ចំណែកតំបន់ប្រយុទ្ធវិញ Gareth Bale នៅមិនទាន់ច្បាស់នៅឡើយ ព្រោះថាខ្សែប្រយុទ្ធវែលរូបនេះ មិនទាន់ពេញ Feed នៅឡើយទេ។ យ៉ាងណាវិញ កំពូលខ្សែប្រយុទ្ធ Cristiano Ronaldo និង Karim Benzema នឹងមានវត្តមានក្នុងជម្រើស ១១នាក់ដំបូងនេះ ស្របពេល​ នៅតំបន់ការពារវិញ Marcelo Ramos, Varane និង Cavarjal លេងពេញជើងល្អណាស់។

គួរបញ្ជាក់ផងដែរថា កាលពីប្រកួតមិត្តភាព នៅសហរដ្ឋអាមេរិក ក្រុម Barcelona បានយកឈ្នះក្រុម Real Madrid ៣-២ ដូច្នេះហើយ ក្នុងជំនួប Spanish Super Cup យប់នេះ ក្រុម Real Madrid នឹងសងសឹកក្រុម Barcelona វិញ ខណៈក្រុម Barcelona ក៍មិនបណ្តោយឲ្យ Real Madrid មានឱកាសដែរ ព្រោះថា វាជាការប្រកួតក្នុងទឹកដីខ្លួនឯង។