ក្រុមបីសាចក្រហម Manchester United មិនបានទាត់ចោលខ្សែប្រយុទ្ធវ័យចំណាស់ Zlatan Ibrahimovic ឡើយខណៈក្រុមកំពុងឡើងកូដមួយនេះ បានត្រៀមចុះកុងត្រាថ្មីឲ្យកីឡាករស៊ុយអ៊ែតរូបនេះ។

ជាក់ស្តែងណាស់ បើតាម ESPN reports បានឲ្យដឹងថា នៅក្នុងសប្តាហ៍នេះ ក្រុមបីសាចក្រហម Manchester United នឹងចុះកុងត្រាថ្មីជាមួយខ្សែប្រយុទ្ធមិនទាន់ជាពីរបួស Zlatan Ibrahimovic ។ ថ្វីបើ នៅពេលបច្ចុប្បន្ននេះ ខ្សែប្រយុទ្ធស្បែកខ្មៅចំណូលថ្មី Romelu Lukaku កំពុងបង្ហាញសមត្ថភាពយ៉ាងល្អ និងរកគ្រាប់បាល់ សឹងគ្រប់ការប្រកួតឲ្យក្រុម បីសាចក្រហម ក៍ដោយតែ Man Utd មិនបានទាត់ចោល Zlatan Ibrahimovic ឡើយ។ ជាក់ស្តែងណាស់ Man Utd នឹងធ្វើការចុះកុងត្រាថ្មីជាមួយខ្សែប្រយុទ្ធស៊ុយអ៊ែតរូបនេះ មិនឲ្យហួសពីសប្តាហ៍នេះឡើយ ដែលសុពលភាពកុងត្រាថ្មីនេះ មានរយៈពេល ១ឆ្នាំបន្តទៀត ពោលគឺក្រុមបីសាចក្រហម Manchester United នឹងផ្តល់ឱកាសឲ្យ Zlatan លេងបានមួយរដូវកាលទៀត។ យ៉ាងណាវិញ សម្រាប់ជម្រើសដំបូង Zlatan Ibrahimovic អាចនឹងប្រឈមជាមួយ Lukaku តែប្រហែលជាលោក Jose Mourinho ប្រើប្រាស់កីឡាករប្រយុទ្ធឆ្នើមទាំង២រូបនេះ ក្នុងការប្រកួតពានរង្វាន់ផ្សេងគ្នា អាចម្នាក់នៅ Premier League និងម្នាក់ទៀត នៅ Champion League ដូចដែលលោកបានធ្វើលើ De Gea និង Romero កាលពីរដូវកាលមុនផងដែរ។

គួររំលឹកផងដែរថា Zlatan Ibrahimovic បានស៊ិតបញ្ចូលទីឲ្យក្រុមបីសាចក្រហម Manchester United ចំនួន ២៨គ្រាប់ គ្រប់ការប្រកួតទាំងអស់នៅរដូវកាលមុន មុនពេលដែលកីឡាកររូបនេះរងរបួស ក្នុងការប្រកួតជាមួយក្រុម Anderlecht នៅក្របខ័ណ្ឌ Europa League ។ ដូច្នេះហើយ Zlatan Ibrahimovic នឹងមានឱកាសបន្តទៀត ក្នុងការចូលរួមជាមួយក្រុម បីសាចក្រហម Manchester United នៅពេលដែលរូបគេ ជាពីរបួសទាំងស្រុង ក្នុងពេលដ៍ខ្លីខាងមុខនេះ។