ក្រុមជម្រើសជាតិ កូរ៉េខាងត្បូង​ និង អារ៉ាប៊ីសាអូឌីត បានធានាកៅអី ឡើងទៅកាន់វគ្គចែកពូល World Cup ២០១៨ ក្នុងប្រទេសរុស្ស៊ីហើយ ខណៈអូស្ត្រាលី និងស៊ីរី ត្រូវលេង Play Off ។

មកទល់ពេលនេះ នៅតំបន់អាស៊ី បានស្វែងរកឃើញក្រុម ៤ហើយដែលកក់សំបុត្រយន្តហោះ ទៅកាន់ប្រទេសរុស្ស៊ី រួមមានដូចជា ជប៉ុន, អ៊ីរ៉ង់, អារ៉ាប៊ីសាអូឌីត​ និងកូរ៉េខាងត្បូង។ យ៉ាងណាវិញ សម្រាប់ក្រុម អូស្ត្រាលី និងស៊ីរី ត្រូវប្រកួត Play Off ជាមួយគ្នាហើយ នឹងត្រូវបន្ត Play Off ជាមួយនៅទ្វីបអាមេរិកបន្តទៀត ដើម្បីស្វែងរកឱកាស ឡើងទៅលេងក្នុងព្រឹត្តិការណ៍ ដ៍សំខាន់នេះ។ កូរ៉េខាងត្បូង ពិតជាមានសំណាងខ្លាំងណាស់ ព្រោះថា ប្រសិនបើអ៊ីរ៉ង់ បន្ឌូរដៃឲ្យស៊ីរីតែបន្តិច នោះកូរ៉េខាងត្បូង នឹងត្រូវលេង Play Off ជំនួស ស៊ីរីវិញ។ ចំណែក អារ៉ាប៊ីសាអូឌីត វិញ បានយកឈ្នះក្រុមខ្លាំងជប៉ុន ១-០ ក្នុងការឡើងទៅកាន់ វគ្គចែកពូល World Cup ដោយបានទម្លាក់ក្រុម អូស្ត្រាលី ឲ្យលេងក្នុងវគ្គ Play Off វិញ។

ដូច្នេះហើយ សម្រាប់តំបន់អាស៊ី បានបញ្ចប់ការប្រកួតតាមពូលជាស្ថាពរហើយ ខណៈ ជប៉ុន, អ៊ីរ៉ង់, អារ៉ាប៊ីសាអូឌីត និង កូរ៉េខាងត្បូង បានឡើងទៅកាន់វគ្គចែកពូល World Cup ២០១៨ នៅប្រទេសរុស្ស៊ី ស្របពេលដែល ស៊ីរី និងអូស្ត្រាលី ត្រូវរង់ចាំអ៊ុតមើលលទ្ធផល ការប្រកួត Play Off បន្តទៀត។