ខ្សែប្រយុទ្ធឆ្នើមអង់គ្លេស Harry Kane តារាស្បែកជើងមាស ២រដូវកាលជាប់គ្នា នៅ Premier League នៅតែជាខ្នាយតាន់របស់ក្រុម Totenham Hotspur ក្នុងការរកគ្រាប់បាល់បញ្ចូលទី​ ដដែលនៅឆ្នាំ​នេះ។

ជាក់ស្តែងណាស់ ក្នុងការប្រកួតជាមួយក្រុមម្ចាស់ផ្ទះ West Ham United ខ្សែប្រយុទ្ធដ៍ឆ្នើម Harry Kane អាចរកគ្រាប់បាល់បញ្ចូលទីបាន ២គ្រាប់ ក្នុងចំណោម ៣គ្រាប់ដែលក្រុម Tottenham យកឈ្នះលើក្រុម West Ham United ៣-២។ Harry Kane បានស៊ុត២គ្រាប់ឲ្យក្រុម Tottenham ក្នុងការនាំមុខម្ចាស់ផ្ទះ West Ham នៅនាទីទី៣៤​ និង៣៨​ ដែលធ្វើឲ្យភ្ញៀវនាំមុខមុន ២-០​ នៅតង់ទី១។

ឈានចូលដល់តង់ទី២​ Tottenham បានបន្ថែមមួយគ្រាប់ទៀត ដោយការស៊ុតរបស់កីឡាករ Christian Erikson នៅនាទីទី ៦០​ តែត្រូវបានតាម១គ្រាប់មកវិញ​ ពីសំណាក់ក្រុម West Ham ដោយកីឡាករ Javier Hernandez នៅនាទីទី៦៥។ ក្តីសង្ឃឹមរបស់ West Ham បានកើតមានឡើង ក្រោយពីកីឡាកររបស់ក្រុម Tottenham ទទួលបានកាតក្រហម នៅនាទីទី៧០​ដោយកីឡាករ Serge Aurier តែ West Ham រកបានត្រឹមតែ១គ្រាប់ទៀតប៉ុណ្ណោះ នៅនាទីទី ៨៧​ដោយ​កីឡាករ Cheikhou Kouyeta ដែលធ្វើឲ្យ West Ham បរាជ័យក្នុងដីខ្លួនឯង ក្រោមស្នាដៃក្រុម Tottenham Hotspur ក្នុងលទ្ធផល ៣-២​។

ដូច្នេះហើយ ខ្សែប្រយុទ្ធដ៍ឆ្នើមអង់គ្លេស និងជាម្ចាស់ស្បែកជើងមាស ២រដូវកាលកន្លងមក Harry Kane ស៊ុតបាន ៤គ្រាប់ហើយ ក្នុងចំណោម ៦ប្រកួតដែលនេះបង្ហាញឲ្យឃើញថា ខ្សែប្រយុទ្ធរូបនេះ នៅតែជាខ្នាយដ៍តាន់សម្រាប់ Tottenham ក្នុងការប្រយុទ្ធ នាសមរភូមិ។

https://www.youtube.com/watch?v=OWvf0K4un28