ក្រុម Paris Saint Germain ពិតជាចាយលុយមិនអត់ប្រយោជន៍ឡើយ នារដូវក្តៅកន្លង​មកនេះ ដែលធ្វើឲ្យក្រុមបារាំងមួយនេះ មានការប្រែប្រួល​យ៉ាងខ្លាំងក្នុងរដូវកាលនេះ។

ជាក់ស្តែងណាស់ ក្នុងការបើកកីឡារដ្ឋានទទួលក្រុមជើងខ្លាំងអាឡឺម៉ង់ Bayern Munich ក្រុម Paris Saint Germain បានបំបាក់យ៉ាងចាស់ដៃ ៣-០​ មិនឲ្យ Bayern Munich តដៃបានឡើយ។ គ្រាប់បាល់របស់ក្រុម Paris Saint Germain ធ្វើបានតាំងពីដើមតង់ទី១​ពោលនៅនាទីទី២​ដោយការស៊ុតរបស់ខ្សែការពារប្រេស៊ីល Dani Alves ក្រោយពីការបញ្ជូនបាល់យ៉ាងល្អពីសំណាក់មិត្តរួមជាតិ Neymar ។ បន្ថែមលើនេះខ្សែប្រយុទ្ធអ៊ុយរ៉ាហ្គាយ Edinson Cavani ក៍បានរកគ្រាប់បាល់ទី២ នៅនាទីទី​៣១ ឲ្យក្រុម Paris Saint Germain ដោយស៊ុតបាល់លើដំបូលទូក​បញ្ចូលទីយ៉ាងអស្ចារ្យបន្ទាប់ពីការបញ្ជូនបាល់យ៉ាងល្អ ពី​សំណាក់កីឡាករវ័យក្មេងបារាំង Kylian Mbape ។ ២គ្រាប់នេះ មិនទាន់ធ្វើឲ្យ Paris Saint Germain ស្កប់ស្កល់ឡើយ ខណៈនៅនាទីទី ៦៣​ Neymar បានបន្ថែម១គ្រាប់ទៀត ក្រោយពីការអូសបាល់ យ៉ាងស្អាត​ពីកីឡាករ Kylian Mbappe ដដែល ហើយបញ្ជូនបាល់ឡងពីជើងខ្សែការពារក្រុម Bayern Munich ដោយ Neymar រត់ទៅស៊ុតបានសម្រេច។

ដូច្នេះហើយ ក្រុម Paris Saint Germain ឈរក្នុងកំពូល​តារាងបណ្តោះអាសន្ន ដោយឈ្នះទាំង២ប្រកួត មាន៦ពិន្ទុក្នុងដៃ​ ស៊ុតគេបាន ៧គ្រាប់មិនទាន់របូតគ្រាប់បាល់ឡើយ។

https://www.youtube.com/watch?v=EcQFBB_RvJ8