ក្រុមជម្រើសជាតិប៉ូឡូញ បានកក់កៅអី ទៅលេងការប្រកួត​ FIFA World Cup ២០១៨ នៅរុស្ស៊ីហើយ ក្រោយពីបានយកឈ្នះក្រុម ម៉ុងតេណេក្រូ ៤-២ យប់មិញនេះ។

ក្តីសម្រម៉ៃដែលក្រុម ជម្រើសជាតិប៉ូឡូញបានខិតខំនាពេលកន្លងមកនេះ បាន​លេចចេញជាផ្លែផ្កាហើយ ព្រោះថា ក្រុមមួយនេះ បានសម្រេចក្តីបំណងឡើងទៅលេង World Cup នៅរុស្ស៊ីហើយ។ គួរបញ្ជាក់ផងដែរថា ក្រោយការបញ្ចប់ ១០ប្រកួតក្នុងពូលកន្លងមក ប៉ូឡូញ បានឈ្នះ ៨ ស្មើ១ និងចាញ់ ១ មាន ២៥ពិន្ទុ ឈរកំពូលតារាង ខណ:ក្រុមជម្រើសជាតិ ដាណឺម៉ាក ត្រូវរង់ចាំក្រុមលេខ ២ល្អ ៨ក្រុមដើម្បីបន្តលេង Play Off បន្តទៀត។

ជ័យជម្នះចុងក្រោយដែល ធ្វើឲ្យប៉ូឡូញ សុវត្ថិភាព ឡើងទៅកាន់វគ្គចែកពូល ដោយបំបាក់ ម៉ុងតេណេក្រូ នោះគ្រាប់បាល់រកបានដោយកីឡាករ Makzynski នៅនាទីទី៦, Kamil Grosicki នៅនាទីទី១៦, Robert Lewandowski នៅនាទីទី ៨៥ និងគ្រាប់បាល់ Own Goal នៅនាទីទី ៨៧ ដោយកីឡាករ​ Filip Stojkovic ។ ចំណែកឯក្រុមភ្ញៀវ ម៉ុងតេណេក្រូ ដែលត្រូវអស់កៅអី និងត្រូវវិលទៅផ្ទះវិញនោះ អាចរកបាន ២គ្រាប់វាយបកវិញ​ដែរ ដោយស៊ុតបានដោយកីឡាករ Stefan Mugosa នៅនាទីទី ៧៨ និង កីឡាករ Zarko Tomasevic នៅនាទីទី ៨៣។

ដូច្នេះហើយ ក្រុមជម្រើសជាតិប៉ូឡូញ បានក្លាយជាក្រុមអឺរ៉ុបមួយទៀត ដែលអាចបន្តទៅកាន់​វគ្គចែកពូល FIFA World Cup ២០១៨ នៅរុស្ស៊ី ឆ្នាំក្រោយនេះ។