អ្នកចាត់ការក្រុម បីសាចក្រហម Manchester United លោក Jose Mourinho កំពុងតែទន្ទឹងរង់ចាំផ្លូវ ការវិលត្រឡប់មកកាន់ទីលានប្រកួតវិញ របស់ខ្សែ​​ប្រយុទ្ធវ័យ៣៦ឆ្នាំ Zlatan Ibrahimovic ។

ថ្វីបើរបួសរបស់ Zlatan Ibrahimovic មិនទាន់អាចឲ្យ​កីឡាករស៊ុយអ៊ែត រូបនេះ ចូលទីលានបានក៍ដោយ តែលោក Mourinho មិនអាចរង់ចាំកីឡាកររូបនេះ រហូតដល់ដើមឆ្នាំក្រោយបានឡើយ។ ជាក់ស្តែងណាស់ បើតាមការចុះផ្សាយរបស់ Sky Sports បានឲ្យដឹងថា លោក Jose Mourinho ចង់ឲ្យ Zlatan Ibrahimovic ចូលលេងឲ្យបីសាចក្រហម Manchester United នៅខែក្រោយនេះ ដោយលោកមិនចង់រង់ចាំរហូតដល់​ខែមករា​ឆ្នាំក្រោយនោះទេ។ ជាការពិតណាស់ របួសរយៈពេលយូរ របស់ Zlatan បានធ្វើឲ្យកីឡាកររូបនេះ ខកខានឱកាសលេង រយៈពេលជាច្រើនខែមកហើយ ឲ្យ Man Utd ជាហេតុធ្វើឲ្យរូបគេបានត្រឹមអង្គយមើលការ​ប្រកួតប៉ុណ្ណោះ។

យ៉ាងណាវិញ បើតាមការចុះផ្សាយ នាពេលកន្លងមក Zlatan Ibrahimovic ត្រូវរង់ចាំរហូតដល់ខែមករា ទើបអាចចូលលេងបាន តែមួយ​រយៈចុងក្រោយនេះ Zlatan បានចូលរួមហ្វឹកហាត់ម្តងម្កាល​ដែរ ដើម្បីឲ្យរូបគេស៊ាំជាមួយនឹងទីលាន ម្យ៉ាងគេអាចចូលលេងបាន តែត្រូវរង់ចាំឆ្នាំក្រោយសិន។ សម្រាប់លោក Jose Mourinho មិនចង់រង់ចាំដល់ឆ្នាំក្រោយ​ ឡើយ លោកចង់ឲ្យ Zlatan មកលេងឲ្យក្លិបនៅខែក្រោយនេះ ដែលនៅមិនដល់ ១០ថ្ងៃទៀតឡើយ បើទោះបីជា Man Utd មានខ្សែប្រយុទ្ធ ចំណូលថ្មី Romelu Lukaku ហើយក៍ដោយ។

ដូច្នេះហើយ គំនិតរបស់លោក Jose Mourinho គឺចង់ឲ្យ​ Lukaku ចាប់ដៃគ្នាជាមួយ Zlatan Ibrahimovic ដើម្បីធ្វើឲ្យតំបន់ប្រយុទ្ធរបស់ Man Utd កាន់តែគ្រោះថ្នាក់​ជាងមុន។