ចប់ការប្រកួតនាពហុកីឡដ្ឋានជាតិ នាវេលាម៉ោង ៦:៣០ នាទីល្ងាចមុននេះ ក្រុមទាល់ទាត់ជម្រើសជាតិកម្ពុជាអាយុក្រោម ១៩ឆ្នាំ យកឈ្នះ ក្រុមជម្រើសជាតិមីយ៉ាន់ម៉ាអាយុក្រោម ១៩ឆ្នាំ ក្នុងលទ្ធផល ៣ទល់២ ដែលជាជំនួបលើកទីពីរ ក្នុងពូល G វគ្គជម្រុះ ពានរង្វាន់យុវជនប្រចាំទ្វីបអាស៊ីអាយុក្រោម១៩ឆ្នាំ ( AFC U-19 Championship 2018)។

នៅក្នុងវគ្គទី១ ក្រុមម្ចាស់ផ្ទះហាក់បីដូចជាធ្វើមិនបានល្អសោះ ដោយក្រុមភ្ញៀវបាននាំមុខមុន ២គ្រាប់ ដោយកីឡាករ HEIN HTET AUNG នៅនាទី ៣៣ ខណ:ដែលខ្សែបម្រើ LWIN MOE AUNG បានទាត់បាល់ពីចម្ងាយយ៉ាងអស់ចា៎! នៅ២នាទី បន្ទាប់។ ឈានចូលមកដល់វគ្គទី២ ក្រុមគោព្រៃជំទង់ បានធ្វើការវាយសម្រុកយ៉ាងខ្លាំង នឹងមានឱកាសទាត់បាល់ពិន័យ(free kick) ពីចម្ងាយដោយកីឡាករ សុិន កក្កដា ២គ្រាប់ មកវិញនៅនាទី ៥៩ នឹង ៨៩ ហើយជិតចប់ការប្រកួត សាន គឹមហេង បន្ថែមួយគ្រាប់យកឈ្នះ នាទី៩០+៣ លទ្ធផលនេះរក្សារហូតដល់ចប់៩០នាទី។

សូមបញ្ជាក់ផងដែរថា គោព្រៃកម្ពុជា នៅសល់មួយប្រកួតទៀត ដែលជួបជាមួយ U-19 ហ្វីលីពីន នាវេលាម៉ោង ៦:៣០ នាទីល្ងាច ថ្ងៃទី២៨ ខែតុលា ឆ្នាំ២០១៧ នាពហុកីឡដ្ឋានជាតិ៕