ក្រុមស្តេចស Real Madrid បានបង្ហាញនូវបញ្ជីឈ្មោះ កីឡាករលក់ចេញ នៅរដូវក្តៅក្រោយនេះ ដោយមានកីឡាករ ៨រូប ដែលក្នុងនោះ មិនមានឈ្មោះ របស់ខ្សែប្រយុទ្ធ Karim Benzema នោះឡើយ។

នេះគឺជារឿង ដ៍ភ្ញាក់ផ្អើលមួយ ដែលពត៌មាននាពេលកន្លងមក បានបង្ហើបឲ្យដឹងពីការលក់ Karim Benzema តែក្នុងបញ្ជីឈ្មោះលក់ចេញ របស់ Real Madrid វិញ បែរជាមិនមានឈ្មោះ ខ្សែប្រយុទ្ធបារាំងរូបនេះទៅវិញ។ ជាក់ស្តែងណាស់ បើតាមការចុះផ្សាយរបស់ Diario Gol បានឲ្យដឹងថា Real Madrid ហាក់មិនចង់លក់ Benzema ចេញឡើយ ព្រោះថាកីឡាករទាំង៨រូប ដែល Real Madrid ត្រៀមលក់​នៅរដូវក្រោយ មិនមានឈ្មោះរបស់ Benzema ឡើយ។ ហេតុផល នេះ ត្រូវបានគេសន្និដ្ឋានថា Real Madrid នឹងរក្សាទុក Benzema ដដែល ថ្វីបើទម្រង់លេង មានការធ្លាក់ចុះជាងមុនមែន តែ Benzema នៅតែអាចរកគ្រាប់បាល់បានដដែល។

ម្យ៉ាងវិញទៀតនោះ Benzema នៅតែជាដៃគូយ៉ាងល្អ ជាមួយកំពូលខ្សែប្រយុទ្ធឆ្នើម Cristiano Ronaldo ដដែល ជាក់ស្តែងដូចជាជំនួប ជាមួយក្រុម APOEL Nicosia កន្លងទៅនេះស្រាប់។ គួរបញ្ជាក់ផងដែរថាបញ្ជី​ឈ្មោះ កីឡាករទាំង៨រូប ដែល Real Madrid ត្រៀមលក់​នៅរដូវក្តៅក្រោយនេះ រួមមានដូចជា Lucas Vazquez, Dani Celbalos, Marcus Llorente, Kiko Casilla, Achraf Hakimi, Jesus Vallejo, Gareth Bale និង Luka Modric ។

ដូច្នេះហើយ ខ្សែប្រយុទ្ធបារាំង Karim Benzema នឹងមានវត្តមានបន្តទៀត នៅ Real Madrid បើទោះបីជាក្លិបយក្សអេស្ប៉ាញរូបនេះ បានត្រៀមទិញ Harry Kane និង Sergio Aguero បន្ថែមក៍ដោយ។