ខ្សែប្រយុទ្ធបារាំង Antonie Griezmann បានប្រាប់មូល​ហេតុមួយដែលរូបគេ មិនបានផ្លាស់មកកាន់ក្រុមកាំភ្លើងធំ Arsenal កាលពីឆ្នាំ ២០១៣ កន្លងមក ក្នុងពេលដែលរូបគេនៅជាកីឡាកររបស់ក្រុម Real Sicieded នៅឡើយ។

បើតាមការចុះផ្សាយរបស់ Express News បានឲ្យដឹងថា ខ្សប្រយុទ្ធដ៍ឆ្នើម​ Antonie Griezmannជិតបានផ្លាស់​មក​កាន់ក្រុមកាំភ្លើងធំ Arsenal ទៅហើយ កាលពីឆ្នាំ ២០១៣ កន្លងមក តែកីឡាកររូបនេះ បែរជាមិនបានមកវិញ។ ជាក់ស្តែងណាស់ កាលពីឆ្នាំ ២០១៣ Griezmann បានជួយឲ្យ Real Socieded ឡើងលេងនៅ Champion League ជាហេតុធ្វើឲ្យរូបគេ ចាប់ផ្តើមមានប្រជាប្រិយភាពឡើង។ យ៉ាងណាវិញនោះ ក្នុងពេលដោះដូរកីឡាករ នារដូវក្តៅឆ្នាំនោះ ក្រុមកាំភ្លើងធំ Arsenal បានទាក់ទងចង់បានកីឡាកររូបនេះ តាមរយៈភ្នាក់ងាររបស់គេ លោក Eric Olhats ។

គ្រាន់តែទទួលដំណឹងនេះភ្លាម Griezmann មានការសប្បាយចិត្តយ៉ាងខ្លាំង ដែលរូបគេអាចនឹងផ្លាស់មកលេងឲ្យក្លិបធំនៅអង់គ្លេសបាន ដែលជាក្តីស្រម៉ៃរបស់រូបគេនោះ។ ម្យ៉ាងវិញទៀត Griezmann បានធ្វើការរង់ចាំយ៉ាងអន្ទះសារ ក្នុងការផ្ទេរទៅនេះ ដោយចាំនោះចាំ តែមិនទាន់ទទួលបាន​ការដោះដូរពិតនៅឡើយ។ អ្វីដែលជាការខកចិត្តដ៍ធំបំផុតរបស់ Griezmann នោះ នៅប៉ុន្មានម៉ោងមុនបិទទីផ្សារដោះដូរកីឡាករ ខ្សែប្រយុទ្ធបារាំងរូបនេះ បានទទួលដំណឹងថា ក្រុមកាំភ្លើងធំ Arsenal មិនបានទិញយករូបគេវិញ ។

ក្រោយមកទៀត នៅខែមករាឆ្នាំ ២០១៤ Griezmann បានទទួលដំណឹងម្តងទៀត ពីការចាប់អារម្មណ៍របស់ក្រុម Arsenal ម្តងទៀត តាមរយៈភ្នាក់ងាររបស់លោក Eric Olhate ម្តងទៀត ក៍ប៉ុន្តែលើកនេះ Griezmann បាននិយាយថា ” បំភ្លេចវាចោលទៅ ព្រោះខ្ញុំធ្លាប់ទទួលការខកចិត្តម្តងរួចហើយ ” ។ ដូច្នេះហើយ ក្នុងឆ្នាំ ២០១៤នេះ ខ្សែប្រយុទ្ធ Antonie Griezmann បានយល់ព្រមផ្លាស់មកកាន់ក្រុម Atletico Madrid វិញ។