នៅខែមករាខាងមុខនេះ ក្រុមតោខៀវ Chelsea បានសម្លឹងឃើញខ្សែប្រយុទ្ធមួយរូបទៀតហើយ ដើម្បីយកមកចាប់ដៃគូជាមួយខ្សែប្រយុទ្ធអេស្ប៉ាញ Alvaro Morata ។

នេះគឺជាការត្រៀមពង្រឹងកម្លាំងថ្មី បន្ថែមក្នុងនាមជាក្រុមការ​ពារជើងឯក ដែល Chelsea បានផ្តោតយ៉ាងខ្លាំងទៅលើ តំបន់ប្រយុទ្ធរបស់ពួកគេ។ ជាក់ស្តែងណាស់ បើតាមការចុះ​ផ្សាយរបស់ Daily Miror បានឲ្យដឹងថា ក្នុងទីផ្សារដោះដូរ​កីឡាករខែមករា ខាងមុខនេះ ក្រុមតោខៀវ Chelsea បានចាប់អារម្មណ៍ក្នុងការទិញយក ខ្សែប្រយុទ្ធ Pierre-Emerick Aubameyang ពីក្រុម Dortmund ។

ជាការពិតណាស់ Aubameyang ថ្វីបើរដូវកាលនេះ មិនទាន់ជួយឲ្យ Dortmund ឈរកំពូលតារាង និងធ្លាក់ចេញ ពីក្របខ័ណ្ឌ UEFA Champion League ក៍ដោយ តែខ្សែប្រយុទ្ធរូបនេះ នៅតែជាកីឡាករដែលតែងតែរកគ្រាបបាល់ ឲ្យក្រុម Dortmund ដដែល។ យ៉ាងណាវិញ សម្រាប់លោក Antonio Conte បានចាប់អារម្មណ៍យ៉ាងខ្លាំង ចំពោះ Aubameyang លោកជឿជក់ថា ប្រសិនបើខ្សែប្រយុទ្ធរូប​នេះ មកកាន់ Chelsea នោះ នោះ Aubameyang ច្បាស់ណាស់ នឹងក្លាយជាដៃគូយ៉ាងល្អ ជាមួយនឹង Alvaro Morata ។

ម្យ៉ាងវិញទៀតនោះ នៅ Chelsea បច្ចុប្បន្ននេះ ខ្សែប្រយទ្ធចំ មានតែ២ រូបប៉ុណ្ណោះ គឺ Alvaro Morata និង Batzuayi ខណៈ Hazard និង Pedro មិនមែនជាខ្សែប្រយុទ្ធចំឡើយ។ ហេតុនេះហើយ ការនាំយក Aubameyang មកកាន់ Chelsea នោះ នឹងអាចធ្វើឲ្យលំនឹងតំបន់ប្រយុទ្ធ របស់ក្លិបការពារជើងឯក Premier League រដូវកាលមុននេះ មានភាពរឹងមាំជាងមុន។ ដូច្នេះ ក្រុមតោខៀវ Chelsea នឹងព្យាយាម ទិញយកខ្សែប្រយុទ្ធ Pierre-Emerick Aubameyang ឲ្យបាននៅខែមករាខាងមុខនេះ។