ស៊ុត២គ្រាប់ដូចគ្នាតែ Man City ជាអ្នកទទួលបាន៣ពិន្ទុ

បើទោះបីជា កីឡាករសំខាន់១រូបរងរបួសក៍ដោយ ក៍ក្រុម Manchester City នៅតែធ្វើបានយ៉ាងល្អដោយបន្តបំបាក់ក្រុម Watford ក្នុងលទ្ធផល ៣-១ យប់មិញនេះ ។

ក្រុមបាល់ទាត់ Manchester City នៅតែរក្សាទម្រង់របស់ពួកគេបានយ៉ាងល្អ បើទោះបីជាអវត្តមាន ខ្សែប្រយុទ្ធ Gabriel Jesus ក៍ដោយ។ ជាក់ស្តែងណាស់ Man City បានបំបាក់ក្រុម Watford ក្នុងលទ្ធផល៣-១ ក្នុងសប្តាហ៍ទី២២ ក្នុងក្របខ័ណ្ឌ Premier League ដែលនេះ គឺជាការរក្សាកំណត់ត្រាមិនចាញ់របស់ក្រុមឈរកំពូលតារាង Premier League មួយនេះ។

៣គ្រាប់របស់ក្រុម Manchester City រកបានដោយ ខ្សែប្រយុទ្ធ អង់គ្លេស Raheem Sterling តាំងពីនាទីទី១ ដែលជាការបញ្ជូនយ៉ាងល្អ ពីសំណាក់ Leroy Sane , គ្រាប់ទី២ ជាការទាត់ចូលទីខ្លួនឯងរបស់កីឡាករ Christian Kabasela នៅនាទីទី១៣ និងគ្រាប់ចុងក្រោយរកបានដោយ ខ្សែប្រយុទ្ធអាហ្សង់ទីន Sergio Aguero នៅនាទីទី ៦៣។ ចំណែកក្រុម Watford អាចវាយបកបានវិញ ត្រឹម១គ្រាប់ប៉ុណ្ណោះ ដែលជាការស៊ុតរបស់កីឡាករ Andre Gray នៅនាទីទី៨៣ ក្នុងការបញ្ចប់លទ្ធផល ៣-១ ។

យ៉ាងណាវិញនោះ បើនិយាយពីគ្រាប់បាល់ស៊ុតវិញ យើងឃើញថា ក្រុមទាំង២ ស៊ុតបានម្នាក់ ២គ្រាប់ដូចគ្នា ខុសត្រង់ថា ខាង Man City ស៊ុតទាំង២គ្រាប់ក្នុងទីរបស់ Watford ខណៈ Watfort វិញ ស៊ុតក្នុងទី Man City ១គ្រាប់ និងក្នុងក្នុងទីខ្លួនឯង១គ្រាប់ ជាហេតុធ្វើឲ្យក្រុម Manchester City ជាអ្នកទទួលបាន ៣ពិន្ទុ ពីការប្រកួតនេះទៅវិញ។

ដូច្នេះហើយ Manchester City នៅតែរក្សាកំពូលតារាងបានយ៉ាងល្អ ដោយឆ្លងកាត់ការប្រកួត ២២លើកកន្លងមកនេះ មិនទាន់ចាញ់១ប្រកួតនៅឡើយទេ ដោយឈ្នះ២០ និងស្មើ២ប្រកួត។