កំពូលខ្សែប្រយុទ្ធអង់គ្លេស Harry Kane របស់ក្រុម Tottenham Hotspurs កំពុងតែត្រៀមធ្វើឲ្យពិភពលោកមានការភ្ញាក់ផ្អើលយ៉ាងខ្លាំង ដោយកីឡាករឆ្នើមរូនេះ រំពឹងថា នឹងឈ្នះស្បែកជើងមាស នៅក្របខ័ណ្ឌកំពូល​របស់អង់គ្លេស Premier League ៣រដូវកាលជាប់ៗគ្នា។

ជាក់ស្តែងណាស់ បន្ទាប់ពីស៊ុតបញ្ចូលទីបាន ២គ្រាប់ក្នុងជំនួបជាមួយក្រុម Everton យប់ម្សិលមិញនេះ បានធ្វើឲ្យ Harry Kane បន្តឈរកំពូលតារាង នៃ Top Scorer នៅ Premier League ។ ជាការពិតណាស់ Harry Kane ស៊ុតបាន២០គ្រាប់ហើយ ក្នុងការបង្ហាញខ្លួនបាន ២៣ប្រកួត ដោយនាំមុខលើគូ​ប្រជែងរបស់គេ Mohamed Salah របស់ក្រុមហង្សក្រហម Liverpool ដែលស៊ុតបាន ១៧គ្រាប់។ យ៉ាងណាវិញនោះ តាមរយៈការនាំមុខចំនួន៣គ្រាប់នេះដែរ ថ្វីបើនៅសល់ការប្រកួតជាច្រើនទៀត តែ Harry Kane ហាក់ដូចជាមានក្តីសង្ឃឹមក្នុងការឈ្នះស្បែកជើងមាសនៅរដូវកាល​នេះទៀត​ ព្រោះថាប្រសិនបើរដវកាលនេះ Kane បន្តឈ្នះទៀតនោះ មនន័យថារូបគេនឹងក្លាយជាកីឡាករដំបូងដែលឈ្នះស្បែកជើងមាស នៅ Premier League ៣រដូវកាលជាប់ៗគ្នា។

ក្រៅពី Harry Kane ដែលស៊ុតបាន ២០គ្រាប់ និង Mohamed Salah ស៊ុតបាន ១៧គ្រាប់​ នៅមាន Raheem Sterling ស៊ុតបាន ១៤គ្រាប់ និង Sergio Aguero ស៊ុតបាន​ ១៣គ្រាប់ ខណៈ Alvaro Morata, Romelu Lukaku និង Wayne Rooney ស៊ុតបានម្នាក់ ១០គ្រាប់។