ក្រុមតោខៀវ Chelsea បានសម្រេចចិត្តខ្ចីជើងខ្សែប្រយុទ្ធ Andy Carroll ពីក្រុម West Ham United នៅមុនបញ្ចប់ទីផ្សារដោះដូរកីឡាករនេះ ដើម្បីមកពង្រឹងតំបន់ប្រយុទ្ធរបស់ក្លិប។

ជាក់ស្តែងណាស់ បើតាមការចុះផ្សាយរបស់ Daily Mail បានឲ្យដឹងថា ក្រុមតោខៀវ Chelsea កំពុងតែស្វះស្វែងរក​ខ្សែប្រយុទ្ធបន្ថែមទៀត នៅមុនការបិទបញ្ចប់ទីផ្សារដោះដូរ​កីឡាករនេះ។ ក្នុងនោះដែរ Chelsea បានចាប់ផ្តើមបើកការចរចារជាមួយក្រុម West Ham United ក្នុងការខ្ចីជើងអតីតខ្សែប្រយុទ្ធ Andy Carroll មកកាន់ Stamford Bridge ក្នុងពេលដ៍ខ្លីខាងមុខនេះ។ ថ្វីត្បិតតែក្រុម Chelsea មាន Alvaro Morata ហើយក៍ដោយ តែក្រុមការពារជើងឯកមួយនេះ នៅតែត្រូវការខ្សែប្រយុទ្ធបន្ថែមដដែល ព្រោះថា Chelsea មានខ្សែប្រយុទ្ធចំតែ២រូបប៉ុណ្ណោះ គឺ Morata និង Micky Batzuayi ខណៈ Eden Hazard, Pedro Rodriguez និង Willian ជាដើមលេងក្នុងតំណែងបម្រើប្រយុទ្ធប៉ុណ្ណោះ មិនមែនជាខ្សែប្រយុទ្ធចំតួឡើយស្របពេលដែល Batzuayi មិនទាន់ច្បាស់ពីអនាគត់នៅ Stamford Bridge ឡើយ។

យ៉ាងណាវិញ ការខ្ចីជើង Andy Carroll ពី West Ham នេះដែរ អាចធ្វើឲ្យក្រុម​តោខៀវ Chelsea មានលំនឹងជាងមុន ប្រសិនបើអវត្តមាន Morata នោះ Andy Carroll អាចជំនួសតំណែងនេះបាន ដោយកីឡាកររូបនេះ មានកាយសម្បទាមាំមួន និងពូកែតែតបាល់បញ្ចូលទីគូប្រកួតផងដែរ ហេតុនេះហើយ ការខ្ចីជើង Andy Carroll ពីក្រុម West Ham អាចធ្វើឲ្យ​តំបន់ប្រយុទ្ធរបស់ Chelsea កាន់តែរឹងមាំជាងមុនជាក់ជា​មិនខាន។