ភាពយឺតយ៉ាវ នៃការទាត់បាល់បញ្ចូលទីរបស់ Cristiano Ronaldo ហាក់មិនទាន់ចោទជាបញ្ហាប៉ុន្មានឡើយ សម្រាប់ខ្សែប្រយុទ្ធមុតស្រួចវ័យ ៣៣ ឆ្នាំរូបនេះ បន្ទាប់ពីមួយរយៈចុងក្រោយនេះ Ronaldo ស៊ុតផ្ទួនៗ តាមជិតទាន់គ្រាប់បាល់របស់ Lionel Messi ។

បើតាមការចុះផ្សាយរបស់ Marca បានឲ្យដឹងថា Cristiano Ronaldo នៅតែអាចឈ្នះស្បែកជើងមាស Laliga រដូវកាលនេះដដែល បើទោះបីជានៅចាញ់គ្រាប់​បាល់ Lionel Messi ចំនួន ៣គ្រាប់ក៍ដោយ។ ជាក់ស្តែងណាស់ កាលពីដើមរដូវកាលកន្លងមក ក្រៅពី​រង​ពិន័យ៧ប្រកួតរួមនឹងការខកខានទាត់បាល់បញ្ចូលទី ជាច្រើនប្រកួតកន្លងមកនោះ បានធ្វើឲ្យ Ronaldo ហាក់គ្មានសង្ឃឹមក្នុងការប្រជែងស្បែកជើងមាសឡើយ ជាពិសេសជាមួយ Lionel Messi ដែលមានគ្រាប់បាល់​ដាច់ជាង ១០គ្រាប់។

យ៉ាងណាវិញ ក្រោយពីឆ្នាំ ២០១៨ បានមកដល់ភ្លាម អ្វីៗមានការ ប្រែប្រួលខុសពីមុន ព្រោះថា Ronaldo ចាប់ផ្តើមបង្ហាញឲ្យឃើញពីថាមពល នៃការស៊ុតបញ្ចូលទីយ៉ាងអស្ចារ្យ ជាហេតុធ្វើឲ្យគម្លាតគ្រាប់បាល់ របស់ Ronaldo កាន់តែខិតជិតជាមួយនឹង Top Scorer កីឡាករ Lionel Messi ។ ដូច្នេះហើយ ការតាមពីក្រោយត្រឹម ៣ គ្រាប់ ពោល ២២-២៥ របស់ Ronaldo ជាមួយនឹង Messi បានក្លាយជាសមរភូមិដ៍តាមតឹងមួយរវាងកីឡាករទាំង២ ក្នុងការប្រជែងស្បែកជើងមាស Laliga រដូវកាលនេះ។

គួរបញ្ជាក់ផងដែរថា ក្រៅពីកីឡាករទាំង២ នៅមាន Luis Suarez មួយរូបទៀតដែលទាត់បាន ២១ គ្រាប់ ស្របពេលដែល Antoine Griezmann ទាត់បាន ១៧ គ្រាប់ផងដែរ។