ការយល់ព្រមផ្លាស់ចេញយ៉ាងឆាប់រហ័ស របស់ខ្សែប្រយុទ្ធកម្ពស់ខ្ពស់ស្រឡះ Zlatan Ibrahimovic ដោយមិនទាប់ចប់កុងត្រាស្រួលបួលផង នោះ បានធ្វើឲ្យ​មានការចាប់អារម្មណ៍ជាច្រើនបានកើតឡើង។

ជាការពិតណាស់ កីឡាករជាច្រើនត្រូវរង់ចាំដល់រដូវក្តៅសិន ទើបអាចចុះកុងត្រា​ ឬសម្រេចចិត្តទៅចូលរួមពេញលក្ខណះ ជាមួយក្លិបថ្មីបាន ក៍ប៉ុន្តែ Zlatan Ibrahimovic វិញ មិនរង់ចាំឡើយ ដោយកីឡាករវ័យចំណាស់ស៊ុយអ៊ែតរូប​នេះ សម្រេចផ្លាស់ទៅកាន់ LA Galaxy មុនរដូវក្តៅទៅទៀត។ ទាក់ទងនឹងបញ្ហានេះ​ដែរ​ បើតាមការចុះផ្សាយរបស់ South China Morning Post បានឲ្យដឹងថា​ ការចាកចេញពី Old Trafford លឿនបែបនេះ ដោយសារតែ Zlatan Ibrahimovic មិនពេញចិត្តជាមួយក្រុមបីសាចក្រហម Manchester United ។

ក្រុមគ្រូពេទ្យ ដែលបានព្យាបាលរបួសកីឡាកររូបនេះ បាននិយាយថា៖ Zlatan បានប្រាប់កាលពីអំឡុងពេលវះកាត់ថា បើ Man Utd ធ្វើមិនបានល្អ នៅ Champion League ពោលគឺជ្រុះចេញពី Champion League រូបគេនឹងមិន​បន្តវត្តមាននៅ Old Trafford ទៀតឡើយ។ ជាក់ស្តែងណាស់ រឿងនេះ បានកើត​ឡើងមែន ពោល Zlatan បានសម្រេចចិត្តផ្លាស់ទៅកាន់ក្រុម LA Galaxy ដោយ​ទទួលបានតម្លៃពលកម្ម ១លានដុល្លាកន្លះ រយៈពេល១ឆ្នាំ បន្ទាប់ពីក្រុម​បីសាចក្រហម Manchester United ជ្រុះចេញពី Champion League ត្រឹមវគ្គ ១៦ក្រុមចុងក្រោយ ក្រោមថ្វីជើង Sevilla ។

Zlatan Ibrahimovic បានមកចូលរួមជាមួយ Man Utd ជិត២រដូវកាលកន្លងមកហើយ តែរដូវកាលមុន​កីឡាកររូបនេះ ញ៉ាំញីដោយសាររបួសជាច្រើនខែ ជាហេតុធ្វើឲ្យកីឡាកររូបនេះ ធ្លាក់កូដយ៉ាងខ្លាំង ខណៈការផ្លាស់ទៅលេងនៅអាមេរិក គឺជាឱកាសចុងក្រោយ​នៃអាជីពបាល់ទាត់របស់ Zlatan Ibrahimovic ហើយ។