គ្រូបង្វឹកក្រុមបាល់ទាត់មេឃខៀវ Manchester City លោក Pep Guadiola បានក្លាយជាគ្រូបង្វឹកដែលមានប្រាក់ឈ្នួលខ្ពស់ជាងគេបំផុត ក្រោយពីបន្តកុងត្រាថ្មី​ជាមួយក្រុមអង់គ្លេសមួយនេះ រហូតដល់ឆ្នាំ ២០២០ ។

បើតាមការចុះផ្សាយរបស់ The Mirror បានឲ្យដឹងថា ក្រុម Manchester City បានសម្រេចចិត្តផ្តល់កុងត្រាថ្មី ដល់លោក Pep Guadiola ដែលកុងត្រាថ្មីនេះ គ្រូបង្វឹកអេស្ប៉ាញរូបនេះ ទទួលបានតម្លៃពលកម្មក្នុងមួយឆ្នាំ ២០លានផោន ដែលជាតម្លៃខ្ពស់ជាងគេបំផុត សម្រាប់គ្រូបង្វឹកទាំងអស់។

ជាការពិតណាស់ លោក Pep Guadiola បានដឹកនាំក្រុម Manchester City ២រដូវកាលកន្លងមក​ហើយ ដោយរដូវកាលទី១ របស់លោក មិនបានជួយក្លិបឲ្យឈ្នះពានណាមួយ​ឡើយ ក៍ប៉ុន្តែ រដូវកាលទី២នេះវិញ លោក Pep Guadiola ពិតជាធ្វើឲ្យ Man City មានការប្រែប្រួលយ៉ាងខ្លាំង ដោយបានឈ្នះពាន Carabao Cup ខណៈ Premier League វិញ កំពុងស្ថិតក្នុងកណ្តាប់ដៃស្រាប់ គ្រាន់តែមិនទាន់លើក​ពានប៉ុណ្ណោះ ស្របពេលដែល Champion League វិញ ត្រូវអ៊ុតមើលជើងទី២ ជាមួយ Liverpool សិន។

យ៉ាងណាវិញ សមទ្ធិផល ដែលលោក Pep Guadiola បានធ្វើឡើងនៅរដូវកាលនេះ ពិតជាមានការភ្ញាក់ផ្អើលយ៉ាងខ្លាំង ថ្វីបើចុងរដូវកាលរាងធ្លាក់ជើងបន្តិចក្តី តែសម្រាប់ Man City វិញ បានសម្រេច​បន្តកុងត្រាថ្មី ដល់លោក ព្រមទាំងផ្តល់ប្រាក់ឈ្នួលរហូតដល់ទៅ ២០លានផោន ក្នុងមួយឆ្នាំផងដែរ។

តម្លៃពលកម្មសម្បើមនេះ បានធ្វើឲ្យលោក Pep Guadiola ក្លាយជាគ្រូបង្វឹកដែលមានតម្លៃពលកម្មខ្ពស់ជាងគេបំផុត នាពេលបច្ចុប្បន្ននេះ ពោលច្រើនជាងលោក Jose Mourinho ដែលមានត្រឹម ប្រមាណ ១០លានផោន​ប៉ុណ្ណោះ។