ក្រុមបីសាចក្រហម Manchester United នៅសល់តែពាន FA Cup មួយទៀតទេ​ ក្នុងរដូវកាលនេះ ដែលក្លិបមួយនេះ រំពឹងអាចដណ្តើមបាន ប្រសិនបើរបូតទៀតនោះ ប្រហែលជាតំណែងរបស់លោក Jose Mourinho មិនអាចធានាបានទៀតឡើយ។

ថ្វីដ្បិតក្រុមបីសាចក្រហម Manchester United នៅមិនទាន់មានការប្រតិកម្ម​ជាមួយនឹងការដឹកនាំរបស់លោក Jose Mourinho ក៍ដោយ ក៍ប៉ុន្តែចំពោះអ្នកគាំ​ទ្រវិញ ហាក់មិនដូចក្លិបឡើយ។ ជាក់ស្តែងណាស់ បើតាមការចុះផ្សាយរបស់ Manchester Evening បានឲ្យដឹងថា ក្រុមអ្នកគាំទ្រជាច្រើនរបស់បីសាចក្រ​ហម មិនចង់ឲ្យលោក Jose Mourinho បន្តតំណែង នៅ Old Trafford ទៀត​ឡើយ ប្រសិនបើរដូវកាលនេះ Man Utd បញ្ចប់ដោយគ្មានឈ្នះពានណាមួយ​នោះ។

Man Utd នៅសល់តែពាន FA Cup មួយប៉ុណ្ណោះ ដែលរំពឹងអាចឈ្នះ​បាន ខណៈពាន Premier League ហាក់ពិបាកក្នុងការប្រជែង ជាមួយ Manchester City និង Champion League វិញនោះ របូតតាំងពីវគ្គ ១៦ក្រុម​ចុងក្រោយម្លេះ។ អ្វីដែលសំខាន់នោះ រដូវកាលនេះ Man Utd ត្រូវតែឈ្នះពាន FA Cup ជាដាច់ខាត បើមិនដូច្នោះទេ ពួកគេប្រឈមជាមួយគំនាបរបស់អ្នកគាំទ្រ ចំពោះវត្តមានលោក Jose Mourinho ជាក់ជាមិនខាន។

គួរបញ្ជាក់ផងដែរថា នេះគឺជារដូវកាលទី២ ហើយ ក្នុងការដឹកនាំក្រុមបីសាចក្រហម Manchester United ខណៈរដូវកាលមុនលោកបានជួយ Man Utd ឈ្នះពាន Community Shield និង UEFA Europa League ខណៈរដូវកាលនេះ មិនទាន់ឈ្នះពានណាមួយឡើយ ដោយរំពឹងពានចុងក្រោយ FA Cup ប៉ុណ្ណោះ។