ក្រោយពីសហព័ន្ធបាល់ទាត់អង់គ្លេស សម្រេចចិត្តបង្កើតពានរង្វាន់ កីឡាករដែល​បញ្ជូនបាល់ឲ្យមិត្តរួមក្រុម ទាត់បញ្ចូលទីច្រើនជាងគេ​ Playmaker Award រួចមក ខ្សែបម្រើប៊ែលហ្ស៊ិក Kevin de Bruyne របស់ក្រុមមេឃខៀវ Manchester City អាចនឹងក្លាយ​ជាកីឡាករ ដំបូងដែលឈ្នះពានមួយនេះ។

នេះគឺជារឿងថ្មីមួយទៀតហើយ សមរាប់ក្របខណ្ឌ Premier League ដោយបង្កើតឲ្យមានទាំងពាន កីឡាករទាត់បញ្ចូលទីច្រើនជាងគេ​ Golden Boot, ពានអ្នកចាំទីសង្រ្គោះបាល់បានច្រើនជាងគេ Golden Glove និងចុងក្រោយនេះ បង្កើតពានរង្វាន់ថ្មី Playmaker Award សម្រាប់កីឡាករដែលបញ្ជូនបាល់ឲ្យមិត្ត​រួមក្រុមទាត់បញ្ចូលទីច្រើនជាងគេបំផុតពេញមួយរដូវកាល។ ក្នុងនោះដែរ Kevin de Bruyne របស់ក្រុម Manchester City រំពឹងថា រូបគេនឹងបង្កើតកំណត់ត្រា​ជាកីឡាករដែលឈ្នះពាន Playmaker Award ដំបូងគេនេះ បន្ទាប់ពីកីឡាករ​ប៊ែលហ្ស៊ិករូបនេះ កំពុងតែនាំមុខគេ ជាអ្នកបោះបាល់ឲ្យមិត្តរួមក្រុមស៊ុតច្រើនជាង​គេ។

គិតត្រឹមសប្តាហ៍ទី ៣៤ ជិតបញ្ចប់រដូវកាលនេះ De Bruyne បោះឲ្យមិត្តរួមក្រុមស៊ុតបាន ១៥គ្រាប់ ឈរលើគេ តាមពីក្រោយដោយ មិត្តរួមក្រុម២រូប Leroy Sane ១២គ្រាប់ និង David Silva បោះបាន ១១គ្រាប់ ខណ: Dele Alli របស់ Spurs និង Paul Pogba របស់ Man Utd បោះបានម្នាក់ ១០គ្រាប់ ចំណែក Top Scorer កីឡាករ Mohamed Salah វិញ បាន ៩គ្រាប់។

ដូច្នេះហើយ ខ្សែបម្រើប៊ែលហ្ស៊ិក Kevin de Bruyne អាចនឹងក្លាយជាកីឡាករ​នៅ Premier League ដំបូងគេបំផុត ក្នុងការក្តាប់ពាន កីឡាករបោះបាល់ឲ្យមិត្តរួ​ម​ក្រុមស៊ុតច្រើនជាងគេ Playmaker Award រដូវកាលនេះ។