ខ្សែប្រយុទ្ធអាហ្សង់ទីន Gonzalo Higuain ត្រៀមក្លាយជាសមាជិករបស់ក្រុម​តោខៀវ Chelsea ហើយ បន្ទាប់ពី Chelsea និង Juventus យល់ព្រមលក្ខខណ្ឌមួយ នៃការដោះដូរកីឡាករជាមួយគ្នា។

បើតាមការចុះផ្សាយរបស់ Mundo Deportivo បានឲ្យដឹងថា ក្រុមតោខៀវ Chelsea និងក្រុមសេះបង្កង់ Juventus បានទទួលយកសំណើរនៃការដោះដូរ​កីឡាកររួចជាស្រេចហើយ។ ក្នុងនោះដែរ កីឡាករដែលក្រុមទាំង២ ត្រៀមផ្លាស់​ប្តូរជាមួយគ្នានោះ គឺខ្សែប្រយុទ្ធអេស្ប៉ាញ Alvaro Morata ត្រូវទៅ Juventus ចំណែក Gonzalo Higuain ត្រូវទៅ Chelsea វិញ។ តាមរយៈការដោះដូរនេះ​ដែរ បង្ហាញឲ្យឃើញថា Higuain នឹងផ្លាស់ប្តូរទៅរកបរិយាកាសថ្មីមួយទៀត នៅក្របខណ្ឌកំពូលអង់គ្លេសវិញម្តង ខណៈ Morata វិញ នឹងវិលទៅកាន់អតីត​ក្លិប​ចាស់របស់គេវិញ នៅ Juventus ដែលជាកន្លែងមួយធ្វើឲ្យប្រជាប្រិយភាព របស់កីឡាករអេស្ប៉ាញរូបនេះ ទទួលបានការចាប់អារម្មណ៍យ៉ាងខ្លាំង កាលពីឆ្នាំ ២០១៥។

ដូច្នេះហើយ​ ក្រុម Juventus និង Chelsea រង់ចាំតែការផ្លាស់ប្តូរចុងក្រោយ​ប៉ុណ្ណោះ ស្របពេលដែលក្រុមទាំង២ បានយល់ព្រមគ្នារួចជាស្រេចទៅហើយ ក្នុងការប្តូរគ្នារវាង Gonzalo Higuain និង Alvaro Morata ។