David de Gea អ្នកចាំទីដៃទី១របស់ក្រុម Manchester United បាននិយាយថាខ្សែប្រយុទ្ធ Zlatan Ibrahimovic លេងសហការគ្នាជាមួយសមាជិកក្រុមបានល្អខ្លាំងណាស់ ដូចធ្លាប់នៅជាមួយគ្នារាប់ឆ្នាំហើយអីចឹង។

បន្ទាប់ពីបង្ហាញខ្លួនលើកដំបូងរកបានគ្រាប់បាល់ដ៏អស្ចារ្យក្នុងប្រកួតមិត្តភាព Man Utd ៥-២ Galatasaray កាលពីពេលកន្លងទៅនេះ មានមតិជាច្រើនបាននិយាយពីទម្រង់លេងរបស់ Zlatan ក្រោមការដឹកនាំរបស់លោក Jose Mourinho ។ ដោយឡែក De Gea ដែលជាកីឡាករសំខាន់ម្នាក់របស់ក្រុមបិសាចក្រហមនោះក៏បានបង្ហាញចំណាប់អារម្មណ៍ដូចគ្នា។

“វាមិនងាយទេក្នុងការលេងជាមួយក្រុមថ្មី ប៉ុន្តែ Zlatan អាចធ្វើវាបាន។ អ្នកអាចឃើញ គាត់ជាកីឡាករល្អម្នាក់ មានមាឌធំ មានចិត្តក្លាហាន និងបច្ចេកទេសខ្ពស់។ ខ្ញុំគិតថាគាត់នឹងជួយបិសាចក្រហមជោគជ័យបាន ព្រោះគាត់មើលទៅដូចនៅជាមួយ Man Utd រាប់ឆ្នាំហើយអីចឹង”។ សម្ដី De Gea ។

Zlatan ផ្ទេរពីក្រុម PSG មកនេះ មិនមានតម្លៃខ្លួននោះទេ ដោយរូបគេពេញចិត្តមកជួយក្រុមបិសាចក្រហម Manchester United ផ្ទាល់តែម្ដង ក្រោយពីមានការចរចាជាមួយលោក Jose Mourinho មក។ ខ្សែប្រយុទ្ធវ័យ៣៤ឆ្នាំរូបនេះ ធ្លាប់និយាយហើយថារូបគេមក Old Trafford ដើម្បីធ្វើជាព្រះជាម្ចាស់ មិនមែនមកធ្វើជាស្ដេចនៅទីនេះទេ៕