លីគបាល់ទាត់មិនអាជីពមួយឈ្មោះថា Futaba Futsal Cup 2016 ដែលមាន១៦ក្រុមចូលរួម បានប្រកាសដំណើការហើយ កាលពីម្សិលមិញ នៅទីលាន Futaba នៅខ័ណ្ឌឬស្សីកែវ ។

អ្នករៀបចម្ការប្រកួតលោក ច្រឹក ផល្លី និយាយថា ការបង្កើតពានមួយនេះគឺដើម្បីបើកឱកាសឲ្យយុវជនចូលរួមប្រជែងសមត្ថភាពលេងបាល់ទាត់ជាក្រុម និងរំលែកពេលទំនេរមកលេងកីឡា ជៀសវាងអំពើអបាយមុខផ្សេងៗ។

លោកបន្តថា សម្រាប់រូបមន្តប្រកួត ក្រុមទាំងអស់ត្រូវចែកជា២ពូល ដោយ១ពូលមាន៨ក្រុម នឹងប្រជែងគ្នាសន្សំពិន្ទុ យក៤ក្រុមខ្ពស់ជាងគេ ឡើងទៅវគ្គខ្វែង នឹងចម្រាញ់យក២ក្រុមទៅលេងវគ្គផ្តាច់ព្រ័ត្រតែម្តង។

Futaba Futsal Cup ឆ្នាំ២០១៦ ជើងឯកនឹងទទួលបានប្រាក់រង្វាន់ ២លានរៀល មេដាយមាស១៨គ្រឿង លេខ២ ១លានរៀលមេដាយប្រាក់១៨ លេខ៣ ៥០ម៉ឺនរៀលមេដាយសំរឹទ្ធ១៨គ្រឿង ក្រុម Fair Play ២០ម៉ឺនរៀល កីឡាករស៊ុតចូលច្រើនជាងគេ ១២ម៉ឺនរៀល កីឡាករលេងល្អ១២ម៉ឺនរៀល និងអ្នកចាំទីល្អ ១២ម៉ឺនរៀល។