គ្រូកម្ពុជា៖ យើងចង់ឈ្នះ តែមហិច្ឆតានិងមាឌអូស្ត្រាលីធំពេក ទើបយើងចាញ់

ជំនួបដំបូងក្នុងពានរង្វាន់ AFF U19 Championship កម្ពុជា បានចាញ់ អូស្ត្រាលី ២-០ កាលពីយប់មិញនៅទីលានហ្វឹកហាត់សាលាបាល់ទាត់ជាតិវៀតណាម។ បរាជ័យនេះត្រូវបានគ្រូបង្គោលលោក Ohara លើកឡើងថា កូនក្រុមខ្លូនពិតជាចង់បាន៣ពិន្ទុ ប៉ុន្តែមហិច្ឆតា និងមាធអូស្ត្រាលី ខ្លាំងពេក ទើបកម្ពុជាមិនអាចឈ្នះបាន។

ថ្លែងក្រោយចប់ការប្រកួតប្រាប់ Post News គ្រូសញ្ជាតិជប៉ុនរូបនេះឲ្យដឹងថា អូស្ត្រាលី បានលេងបាល់គ្រោះថ្នាក់ជាច្រើន និងសម្រុកតាំងពីដើមទី គួបផ្សំនិងមាធរបស់ពួកគេធំស្រាប់ មិនអាចឲ្យក្រុមកម្ពុជាដណ្តើមបាល់បានដោយស្រួល។

“មែន ថ្ងៃនេះយើងចង់ឈ្នះ ប៉ុន្តែមិនអាចទេ ព្រោះអូស្រ្តាលីដាក់សម្ពាធខ្លាំងណាស់។ ពួកគេលេងបាល់គ្រោះថ្នាក់ជាច្រើន រហូតបង្ករបួសដល់កីឡាករយើងជាច្រើននាក់។ ដូច្នេះហើយយើងគ្មានជម្រើសទេ ពួកគេប្រើមាឌដ៏ធំមកប៉ាំងមុខយើង។ ខ្ញុំពិតជាស្តាយដែលចាញ់ ប៉ុន្តែយើងនឹងព្យាយាមឲ្យល្អនៅប្រកួតក្រោយទៀត។” សម្តីលោក Ohara។

ទោះមានការប៉ះទង្គិចខ្លាំង នៅវគ្គទី១ ប៉ុន្តែកម្ពុជារក្សាបានលទ្ធផល ០-០។ ប៉ុន្តែឈានដល់វគ្គទី២ ដល់នាទី៦៣ កីឡាករ Blacj Wood របស់ក្រុមកង់គូរូ រកបាន១គ្រាប់ មុននឹងបន្ថែមគ្រាប់បាល់ជ័យជម្នះ១គ្រាប់ទៀតនៅនាទីទី៦៦ ដោយបាល់ពិន័យ១១ម៉ែត្រ។

ថ្ងៃជាមួយគ្នាក្នុងពូល B មីយ៉ាន់ម៉ា បានបំបាក់ ឥណ្ឌូនេស៊ី ៣-២។ ដោយឡែកប្រកួតបន្ទាប់ កម្ពុជា និងប៉ះ ឡាវ ស្អែកនេះ នៅទីលានដដែល វេលាម៉ោង៦:០០នាទីយប់។